dil hi dil mein dard ke aise ishaare ho gae

dil hī dil meñ dard ke aise ishāre ho ga.e

ġham zamāne ke sharīk-e-ġham hamāre ho ga.e

jo abhī mahfūz haiñ tanqīd hai un kā shi.ār

haal un kā pūchhiye jo be-sahāre ho ga.e

bin khile murjhā ga.iiñ kaliyāñ chaman meñ kis qadar

zard-rū kis darja haa.e māh-pāre ho ga.e

amn kī tāqat ko kuchlā sach ko rusvā kar diyā

dushmanoñ ke chār-din meñ vāre-nyāre ho ga.e

ye zamāna kis qadar bār-e-garāñ sābit huā

apne begāne hue begāne pyāre ho ga.e

dushman-e-dīñ dushman-e-jāñ dushman-e-amn-o-sukūñ

ek do kā zikr kyā saare ke saare ho ga.e

Dūbne vāloñ se zaa.id khā rahā hai un kā ġham

jin ko sāhil teġh-e-uryāñ ke kināre ho ga.e

ashk-e-ġham meñ nūr-e-rahmat is tarah shāmil rahā

chāñd-tāroñ se sivā ye chāñd-tāre ho ga.e

haif gulzār-e-jahāñ meñ chhā ga.ī ġham kī ghaTā

jo shagūfe the chaman meñ vo sharāre ho ga.e

dil hi dil mein dard ke aise ishaare ho gae

gham zamane ke sharik-e-gham hamare ho gae

jo abhi mahfuz hain tanqid hai un ka shiar

haal un ka puchhiye jo be-sahaare ho gae

bin khile murjha gain kaliyan chaman mein kis qadar

zard-ru kis darja hae mah-pare ho gae

amn ki taqat ko kuchla sach ko ruswa kar diya

dushmanon ke chaar-din mein ware-nyare ho gae

ye zamana kis qadar bar-e-garan sabit hua

apne begane hue begane pyare ho gae

dushman-e-din dushman-e-jaan dushman-e-amn-o-sukun

ek do ka zikr kya sare ke sare ho gae

Dubne walon se zaid kha raha hai un ka gham

jin ko sahil tegh-e-uryan ke kinare ho gae

ashk-e-gham mein nur-e-rahmat is tarah shamil raha

chand-taron se siwa ye chand-tare ho gae

haif gulzar-e-jahan mein chha gai gham ki ghaTa

jo shagufe the chaman mein wo sharare ho gae