dil hi dil mein sulag ke bujhe hum aur sahe gham dur hi dur

dil hī dil meñ sulag ke bujhe ham aur sahe ġham duur hī duur

tum se kaun sī aas bañdhī thī tum se rahe ham duur hī duur

tum ne ham ko jab bhī dekhā shukr-ba-lab the yā ḳhāmosh

yuuñ to aksar ro.e lekin chhup chhup kam kam duur hī duur

jal jal bujh ga.ī koñpal koñpal kyā kyā armāñ ḳhaak hue

āñkheñ to bhar laa.e pa bādal barse chham-chham duur hī duur

ek vo aan ki un kī zarā sī baat gavārā kar na sake

ek ye haal ki yaad meñ un kī ro.e paiham duur hī duur

tark-e-talab par ḳhush the ki āḳhir kaam liyā dānā.ī se

kis ko ḳhabar hai jalte rahe tum jalte rahe ham duur hī duur

dil hi dil mein sulag ke bujhe hum aur sahe gham dur hi dur

tum se kaun si aas bandhi thi tum se rahe hum dur hi dur

tum ne hum ko jab bhi dekha shukr-ba-lab the ya KHamosh

yun to aksar roe lekin chhup chhup kam kam dur hi dur

jal jal bujh gai konpal konpal kya kya arman KHak hue

aankhen to bhar lae pa baadal barse chham-chham dur hi dur

ek wo aan ki un ki zara si baat gawara kar na sake

ek ye haal ki yaad mein un ki roe paiham dur hi dur

tark-e-talab par KHush the ki aaKHir kaam liya danai se

kis ko KHabar hai jalte rahe tum jalte rahe hum dur hi dur