dil hi mein nala-e-shab-gir ulaT jata hai

dil hī meñ nāla-e-shab-gīr ulaT jaatā hai

nā-muvāfiq hai havā tiir ulaT jaatā hai

naale us kī nigah-e-qahr se ruk jaate haiñ

tiir se murġh-e-havā-gīr ulaT jaatā hai

jalva-gah meñ tirī kyā Thahrūñ ki saaya nā-chār

jab huā rūkash-e-tanvīr ulaT jaatā hai

Thahrā iz.hār-e-vafā shikva-e-vasl-e-aġhyār

rashk se hāsil-e-taqrīr ulaT jaatā hai

muñh ḳharābāt meñ rindoñ se chhupā.e kyā shaiḳh

nashshe meñ dāman-e-tazvīr ulaT jaatā hai

zauq-e-tahsīn 'zakī' kis qadar allāh-allāh

dam-e-bismil dam-e-takbīr ulaT jaatā hai

dil hi mein nala-e-shab-gir ulaT jata hai

na-muwafiq hai hawa tir ulaT jata hai

nale us ki nigah-e-qahr se ruk jate hain

tir se murgh-e-hawa-gir ulaT jata hai

jalwa-gah mein teri kya Thahrun ki saya na-chaar

jab hua rukash-e-tanwir ulaT jata hai

Thahra izhaar-e-wafa shikwa-e-wasl-e-aghyar

rashk se hasil-e-taqrir ulaT jata hai

munh KHarabaat mein rindon se chhupae kya shaiKH

nashshe mein daman-e-tazwir ulaT jata hai

zauq-e-tahsin 'zaki' kis qadar allah-allah

dam-e-bismil dam-e-takbir ulaT jata hai