dil ek duniya basa leta hai gar koi nahin aata

dil ik duniyā basā letā hai gar koī nahīñ aatā

faqat mahsūs kartā hai nazar koī nahīñ aatā

ḳhabar achchhī burī taaza purānī ho na ho phir bhī

hamārī mahfiloñ meñ be-ḳhabar koī nahīñ aatā

jo pīchhe chhoḌ aa.e haiñ usī pe lauT jā.eñge

khulegā jab ki in rastoñ pe ghar koī nahīñ aatā

kabhī shātir se shāyad is liye bhī jiit saktā huuñ

ki mujh ko chaal chalne kā hunar koī nahīñ aatā

bure vaqtoñ ne aisā gher rakkhā hai ki barsoñ se

idhar achchhe dinoñ kā nāma-bar koī nahīñ aatā

guzar jaao 'shahāb' is pur-ḳhatar kāñToñ ke jañgal se

ki is ke baad phir aisā safar koī nahīñ aatā

dil ek duniya basa leta hai gar koi nahin aata

faqat mahsus karta hai nazar koi nahin aata

KHabar achchhi buri taza purani ho na ho phir bhi

hamari mahfilon mein be-KHabar koi nahin aata

jo pichhe chhoD aae hain usi pe lauT jaenge

khulega jab ki in raston pe ghar koi nahin aata

kabhi shatir se shayad is liye bhi jit sakta hun

ki mujh ko chaal chalne ka hunar koi nahin aata

bure waqton ne aisa gher rakkha hai ki barson se

idhar achchhe dinon ka nama-bar koi nahin aata

guzar jao 'shahab' is pur-KHatar kanTon ke jangal se

ki is ke baad phir aisa safar koi nahin aata