dil ishq mein tabah hua ya ki jal gaya

dil ishq meñ tabāh huā yā ki jal gayā

achchhā huā ḳhalish ga.ī kāñTā nikal gayā

ulfat meñ us kī jaan ga.ī dil bhī jal gayā

dushman kā do hī din meñ divāla nikal gayā

dil apnā us se māñgne ko maiñ jo kal gayā

āñkheñ nikāleñ laḌne ko fauran badal gayā

jalte haiñ ġhair apnā to matlab nikal gayā

qismat se baat ban bhī ga.ī daav chal gayā

tārīf-e-husn-e-yār ne is ko kyā raqīb

rahbar bhī beach raste meñ ham se badal gayā

kartā huuñ arz un se jo chalne kī maiñ kahīñ

kahte haiñ kyā dimāġh tumhārā bhī chal gayā

bhārī hai raat hijr kī bīmār par tire

phir us ko ḳhauf kuchh nahīñ ye din jo Tal gayā

dushman ke naqsh-e-pā ko jo dete ho gāliyāñ

piiTo lakīr saañp to aayā nikal gayā

kis rañg meñ vo rahte haiñ us kī ḳhabar nahīñ

mahfil meñ in kī aaj maiñ pahle-pahal gayā

armān kyā ga.e ki gayā dil bhī ishq meñ

ye vo juā hai jis meñ hamārā mudal gayā

vo jalva-gāh-e-nāz ho yā bazm-e-ġhair ho

jannat hameñ vahīñ hai jahāñ dil bahal gayā

dushman bhī jāñ-nisār bane de ke apnā dil

hairat hai mujh ko rūpaya khoTā bhī chal gayā

anjām-e-ishq dekh liyā apnī aañkh se

ab to safī' dimāġh kā tere ḳhalal gayā

dil ishq mein tabah hua ya ki jal gaya

achchha hua KHalish gai kanTa nikal gaya

ulfat mein us ki jaan gai dil bhi jal gaya

dushman ka do hi din mein diwala nikal gaya

dil apna us se mangne ko main jo kal gaya

aankhen nikalen laDne ko fauran badal gaya

jalte hain ghair apna to matlab nikal gaya

qismat se baat ban bhi gai daw chal gaya

tarif-e-husn-e-yar ne is ko kya raqib

rahbar bhi beach raste mein hum se badal gaya

karta hun arz un se jo chalne ki main kahin

kahte hain kya dimagh tumhaara bhi chal gaya

bhaari hai raat hijr ki bimar par tere

phir us ko KHauf kuchh nahin ye din jo Tal gaya

dushman ke naqsh-e-pa ko jo dete ho galiyan

piTo lakir sanp to aaya nikal gaya

kis rang mein wo rahte hain us ki KHabar nahin

mahfil mein in ki aaj main pahle-pahal gaya

arman kya gae ki gaya dil bhi ishq mein

ye wo jua hai jis mein hamara mudal gaya

wo jalwa-gah-e-naz ho ya bazm-e-ghair ho

jannat hamein wahin hai jahan dil bahal gaya

dushman bhi jaan-nisar bane de ke apna dil

hairat hai mujh ko rupaya khoTa bhi chal gaya

anjam-e-ishq dekh liya apni aankh se

ab to safi' dimagh ka tere KHalal gaya