dil jaisa zamane mein koi ghar bhi to hota

dil jaisā zamāne meñ koī ghar bhī to hotā

sar ham bhī jhukā dete magar dar bhī to hotā

ham kaise yaqīñ karte bhalā us ke kahe par

jo kuchh thā bazāhir vahī andar bhī to hotā

ik she'r meñ duniyā ke masā.il ko samo de

arbāb-e-suḳhan aisā suḳhanvar bhī to hotā

matvāle mohabbat ke kahāñ rahne ko jaate

apnā bhī koī hai ye tasavvur bhī to hotā

'ġhālib' kī tarah kahne lage she'r bahut log

lekin koī us qad ke barābar bhī to hotā

sunte haiñ 'vasiyya' ke liye ro.e bahut log

ashkoñ se koī dāman-e-dil tar bhī to hotā

dil jaisa zamane mein koi ghar bhi to hota

sar hum bhi jhuka dete magar dar bhi to hota

hum kaise yaqin karte bhala us ke kahe par

jo kuchh tha bazahir wahi andar bhi to hota

ek she'r mein duniya ke masail ko samo de

arbab-e-suKHan aisa suKHanwar bhi to hota

matwale mohabbat ke kahan rahne ko jate

apna bhi koi hai ye tasawwur bhi to hota

'ghaalib' ki tarah kahne lage she'r bahut log

lekin koi us qad ke barabar bhi to hota

sunte hain 'wasiyya' ke liye roe bahut log

ashkon se koi daman-e-dil tar bhi to hota