dil jal ke rah gae zaqan-e-rashk-e-mah par

dil jal ke rah ga.e zaqan-e-rashk-e-māh par

is qāfila ko pyaas ne maarā hai chaah par

gesū ko naaz hai dil-e-raushan kī chaah par

parvāna ye charāġh hai mār-e-siyāh par

niiñd uḌ ga.ī girāñ hai ye shab rashk-e-māh par

bijlī na kyuuñ falak se gire merī aah par

hai yaad ḳhuftgān-e-zamīñ kā jo ḳhatt-e-sabz

bhūle se maiñ qadam nahīñ rakhtā giyāh par

luTtā hai ḳhāna-e-dil-e-āshiq bachā.iye

bigḌī huī hai fauj-e-mizha kis gunāh par

tāsīr kā hai ḳhauf unheñ ain shauq meñ

hai dil pe haath kaan haiñ āvāz-e-āh par

mahshar bapā hai band haiñ kushtoñ ke rāste

qad baaḌh par hai baaḌh hai teġh-e-nigāh par

kyā aadmī kī ḳhaak ko rauñdūñ maiñ rahm-dil

rotā hai pā.emāli-e-mardum-giyāh par

kahte ho kis ke qalb meñ uThtā hai shab ko dard

rotā hai dil mirā mire hāl-e-tabāh par

āḳhir talāsh-e-gor huī dil ko ishq meñ

barsoñ tabāh ho ke ab aayā hai raah par

dil ke muāmle meñ na ho daḳhl ġhair ko

lenā jo ho to lījiye apnī nigāh par

uupar kī saañs lene kā āzār ho gayā

jis kī nazar paḌī tirī tirchhī nigāh par

baḳhiya jarāhat-e-dil-e-nāzuk-mizāj kā

mauqūf hai huzūr ke tār-e-nigāh par

dil jal ke rah gae zaqan-e-rashk-e-mah par

is qafila ko pyas ne mara hai chah par

gesu ko naz hai dil-e-raushan ki chah par

parwana ye charagh hai mar-e-siyah par

nind uD gai giran hai ye shab rashk-e-mah par

bijli na kyun falak se gire meri aah par

hai yaad KHuftgan-e-zamin ka jo KHatt-e-sabz

bhule se main qadam nahin rakhta giyah par

luTta hai KHana-e-dil-e-ashiq bachaiye

bigDi hui hai fauj-e-mizha kis gunah par

tasir ka hai KHauf unhen ain shauq mein

hai dil pe hath kan hain aawaz-e-ah par

mahshar bapa hai band hain kushton ke raste

qad baDh par hai baDh hai tegh-e-nigah par

kya aadmi ki KHak ko raundun main rahm-dil

rota hai paemali-e-mardum-giyah par

kahte ho kis ke qalb mein uThta hai shab ko dard

rota hai dil mera mere haal-e-tabah par

aaKHir talash-e-gor hui dil ko ishq mein

barson tabah ho ke ab aaya hai rah par

dil ke muamle mein na ho daKHl ghair ko

lena jo ho to lijiye apni nigah par

upar ki sans lene ka aazar ho gaya

jis ki nazar paDi teri tirchhi nigah par

baKHiya jarahat-e-dil-e-nazuk-mizaj ka

mauquf hai huzur ke tar-e-nigah par