dil jinko pujta tha wo gham jagte rahe

dil jin ko pūjtā thā vo ġham jāgte rahe

kal raat but-kade meñ sanam jāgte rahe

us vaqt bhī ki saarā zamāna thā mahv-e-ḳhvāb

ham vārisān-e-lauh-o-qalam jāgte rahe

luTte rahe haiñ shahr-e-nigārāñ meñ raat bhar

hālāñki ahl-e-dair-o-haram jāgte rahe

aatī rahī hameñ tirī aahaT tamām raat

sunte rahe sadā-e-qadam jāgte rahe

un se chhiḌī huī thiiñ unhī kī hikāyateñ

kal saarī raat ḳhvāb meñ ham jāgte rahe

uljhe rahe jo mere tasavvur se raat bhar

ḳhvābīda gesuoñ ke vo ḳham jāgte rahe

rātoñ ko ham ne yuuñ bhī kiyā din kabhī kabhī

piite rahe sharāb-e-alam jāgte rahe

chheḌī jo 'badr' ham ne shab-e-ġham kī dāstāñ

taare qarīb-e-dīda-e-nam jāgte rahe

dil jin ko pujta tha wo gham jagte rahe

kal raat but-kade mein sanam jagte rahe

us waqt bhi ki sara zamana tha mahw-e-KHwab

hum warisan-e-lauh-o-qalam jagte rahe

luTte rahe hain shahr-e-nigaran mein raat bhar

haalanki ahl-e-dair-o-haram jagte rahe

aati rahi hamein teri aahaT tamam raat

sunte rahe sada-e-qadam jagte rahe

un se chhiDi hui thin unhi ki hikayaten

kal sari raat KHwab mein hum jagte rahe

uljhe rahe jo mere tasawwur se raat bhar

KHwabida gesuon ke wo KHam jagte rahe

raaton ko hum ne yun bhi kiya din kabhi kabhi

pite rahe sharab-e-alam jagte rahe

chheDi jo 'badr' hum ne shab-e-gham ki dastan

tare qarib-e-dida-e-nam jagte rahe