dil ka aazar kam nahin hota

dil kā āzār kam nahīñ hotā

shauq-e-dīdār kam nahīñ hotā

baḌh rahī hai bahut masīhā.ī

dard-e-bīmār kam nahīñ hotā

sul.h-sāzān-e-bazm-e-ālam kā

josh-e-paikār kam nahīñ hotā

dekh kar tum ko aur ko dekheñ

ab to me.aar kam nahīñ hotā

un ke inkār-e-rūh-farsā se

un kā iqrār kam nahīñ hotā

ai falak aur koī taaza sitam

karam-e-yār kam nahīñ hotā

zāhirī haq-parastiyoñ se kabhī

kufr-e-dīñ-dār kam nahīñ hotā

daur-e-mai meñ kamī to aatī hai

shauq-e-mai-ḳhvār kam nahīñ hotā

mai se raġhbat hai shaiḳh ko har-chand

mai se inkār kam nahīñ hotā

'arsh' dād-e-suḳhan na milne se

lutf-e-ash.ār kam nahīñ hotā

dil ka aazar kam nahin hota

shauq-e-didar kam nahin hota

baDh rahi hai bahut masihai

dard-e-bimar kam nahin hota

sulh-sazan-e-bazm-e-alam ka

josh-e-paikar kam nahin hota

dekh kar tum ko aur ko dekhen

ab to mear kam nahin hota

un ke inkar-e-ruh-farsa se

un ka iqrar kam nahin hota

ai falak aur koi taza sitam

karam-e-yar kam nahin hota

zahiri haq-parastiyon se kabhi

kufr-e-din-dar kam nahin hota

daur-e-mai mein kami to aati hai

shauq-e-mai-KHwar kam nahin hota

mai se raghbat hai shaiKH ko har-chand

mai se inkar kam nahin hota

'arsh' dad-e-suKHan na milne se

lutf-e-ashaar kam nahin hota