dil ka darwaza khula ho jaise

dil kā darvāza khulā ho jaise

aur koī jhāñk rahā ho jaise

dhyān terā sahar-o-shām nahīñ

tū mujhe bhuul gayā ho jaise

dil meñ kuchh aur laboñ par kuchh aur

tark-e-ulfat kī duā ho jaise

phir vahī zulm vahī ḳhalq-e-ḳhudā

ḳhushk pattoñ meñ havā ho jaise

shahr-e-bedād meñ hubb-ul-vatanī

ik munāfiq kī vafā ho jaise

dard be-nūr huā jaatā hai

kam-nigāhī kī sazā ho jaise

daf.atan zehn meñ vo gardish-e-mai

ik bagūlā sā uThā ho jaise

muddatoñ ba.ad sar-e-rāhguzar

ajnabī koī milā ho jaise

jur.a-o-lams kī daryūza-garī

ruuh meñ qaht paḌā ho jaise

yaad yuuñ dil se guzartī hai 'munīr'

dasht meñ ābla-pā ho jaise

dil ka darwaza khula ho jaise

aur koi jhank raha ho jaise

dhyan tera sahar-o-sham nahin

tu mujhe bhul gaya ho jaise

dil mein kuchh aur labon par kuchh aur

tark-e-ulfat ki dua ho jaise

phir wahi zulm wahi KHalq-e-KHuda

KHushk patton mein hawa ho jaise

shahr-e-bedad mein hubb-ul-watani

ek munafiq ki wafa ho jaise

dard be-nur hua jata hai

kam-nigahi ki saza ho jaise

dafatan zehn mein wo gardish-e-mai

ek bagula sa uTha ho jaise

muddaton baad sar-e-rahguzar

ajnabi koi mila ho jaise

jura-o-lams ki daryuza-gari

ruh mein qaht paDa ho jaise

yaad yun dil se guzarti hai 'munir'

dasht mein aabla-pa ho jaise