dil ka shiraaza munazzam nahin hone pata

dil kā shīrāza munazzam nahīñ hone paatā

nāz-e-ḳhud-rā.ī magar kam nahīñ hone paatā

ḳhud-parastī kī havas jis meñ samā jaatī hai

vo mukarram vo muazzam nahīñ hone paatā

nazm nāsūr huā jaatā hai dhīre dhīre

kārgar koī bhī marham nahīñ hone paatā

ek sā rahtā hai ye dil ke nihāñ-ḳhāne meñ

besh-o-kam dard-e-shab-e-ġham nahīñ hone paatā

kabhī duur aur kabhī qurb lagā rahtā hai

mustaqil rishta-e-bāham nahīñ hone paatā

vādī-e-dil meñ chalā aatā hai chupke se koī

kabhī tanhā.ī kā aalam nahīñ hone paatā

choT lag jaa.e unheñ gul se to gulshan ro.e

mirī barbādī kā mātam nahīñ hone paatā

eḌiyāñ mārne vaale haiñ zamāne meñ bahut

kyoñ ravāñ chashma-e-zamzam nahīñ hone paatā

dast-o-bāzū-e-ḳhilāfat ko bachā lete agar

sar-nigūñ apnā ye parcham nahīñ hone paatā

jo bhī aatā hai havā de ke chalā jaatā hai

koī sho.ala kabhī shabnam nahīñ hone paatā

yaad rakh 'shād' kabhī haqq-o-sadāqat kā charāġh

sarsar-e-vaqt se maddham nahīñ hone paatā

dil ka shiraaza munazzam nahin hone pata

naz-e-KHud-rai magar kam nahin hone pata

KHud-parasti ki hawas jis mein sama jati hai

wo mukarram wo muazzam nahin hone pata

nazm nasur hua jata hai dhire dhire

kargar koi bhi marham nahin hone pata

ek sa rahta hai ye dil ke nihan-KHane mein

besh-o-kam dard-e-shab-e-gham nahin hone pata

kabhi dur aur kabhi qurb laga rahta hai

mustaqil rishta-e-baham nahin hone pata

wadi-e-dil mein chala aata hai chupke se koi

kabhi tanhai ka aalam nahin hone pata

choT lag jae unhen gul se to gulshan roe

meri barbaadi ka matam nahin hone pata

eDiyan marne wale hain zamane mein bahut

kyon rawan chashma-e-zamzam nahin hone pata

dast-o-bazu-e-KHilafat ko bacha lete agar

sar-nigun apna ye parcham nahin hone pata

jo bhi aata hai hawa de ke chala jata hai

koi shoala kabhi shabnam nahin hone pata

yaad rakh 'shad' kabhi haqq-o-sadaqat ka charagh

sarsar-e-waqt se maddham nahin hone pata