dil ka sukun DhunDhne jae bashar kahan

dil kā sukūn DhūñDhne jaa.e bashar kahāñ

aisā nagar hai kaun sā aisā hai dar kahāñ

tum ne to kah diyā ki chale jaao bazm se

ye to batā do ham ko ki jaa.eñ kidhar kahāñ

us kī galī ko chhoḌ ke aa to ga.e magar

ab sochte haiñ guzreñge shām-o-sahar kahāñ

baiTho hamāre paas karo ham se dil kī baat

har aadmī milegā tumheñ mo'atabar kahāñ

phailī huī hai dhuup masā.ib kī duur tak

ab sāya-dār raah meñ merī shajar kahāñ

jab chārāgar hī koī nahīñ tere shahar meñ

le kar maiñ jā.ūñ apnā ye zaḳhm-e-jigar kahāñ

kisī kī 'qamar' talāsh hai kisī kī hai aarzū

nikle ho itnī raat meñ tanhā idhar kahāñ

dil ka sukun DhunDhne jae bashar kahan

aisa nagar hai kaun sa aisa hai dar kahan

tum ne to kah diya ki chale jao bazm se

ye to bata do hum ko ki jaen kidhar kahan

us ki gali ko chhoD ke aa to gae magar

ab sochte hain guzrenge sham-o-sahar kahan

baiTho hamare pas karo hum se dil ki baat

har aadmi milega tumhein mo'atabar kahan

phaili hui hai dhup masaib ki dur tak

ab saya-dar rah mein meri shajar kahan

jab chaaragar hi koi nahin tere shahar mein

le kar main jaun apna ye zaKHm-e-jigar kahan

kisi ki 'qamar' talash hai kisi ki hai aarzu

nikle ho itni raat mein tanha idhar kahan