dil ke aangan mein jo diwar uTha li jae

dil ke āñgan meñ jo dīvār uThā lī jaa.e

ek khiḌkī bhī mohabbat kī banā lī jaa.e

paak sīrat haiñ bahut nuur kā paikar haiñ vo

zehn meñ husn kī tasvīr banā lī jaa.e

zer karne ke liye laakh tarīqe DhūñDo

kyā zarūrī hai ki dastār uchhālī jaa.e

zehn chāhat kī hī ḳhushbū se mo.attar hogā

zehn meñ baat adāvat kī na paalī jaa.e

aam rasta hai yahāñ bhiiḌ milegī tum ko

matlabī raah pe ye ziist na Dhālī jaa.e

ek kam-zarf ke ehsān tale dab jaanā

is se behtar hai ki kashkol uThā lī jaa.e

kījiye aap to mehmān-navāzī 'sājid'

gar hai zahmat to ye zahmat bhī uThā lī jaa.e

dil ke aangan mein jo diwar uTha li jae

ek khiDki bhi mohabbat ki bana li jae

pak sirat hain bahut nur ka paikar hain wo

zehn mein husn ki taswir bana li jae

zer karne ke liye lakh tariqe DhunDo

kya zaruri hai ki dastar uchhaali jae

zehn chahat ki hi KHushbu se moattar hoga

zehn mein baat adawat ki na pali jae

aam rasta hai yahan bhiD milegi tum ko

matlabi rah pe ye zist na Dhaali jae

ek kam-zarf ke ehsan tale dab jaana

is se behtar hai ki kashkol uTha li jae

kijiye aap to mehman-nawazi 'sajid'

gar hai zahmat to ye zahmat bhi uTha li jae