dil ke zaKHmon pe wo marham jo lagana chahe

dil ke zaḳhmoñ pe vo marham jo lagānā chāhe

vājibāt apne purāne vo chukānā chāhe

merī āñkhoñ kī samundar meñ utarne vaalā

aisā lagtā hai mujhe aur rulānā chāhe

dil ke āñgan kī kaḌī dhuup meñ ik doshīza

marmarīñ bhīgā huā jism sikhānā chāhe

saikḌoñ log the maujūd sar-e-sāhil-e-shauq

phir bhī vo shoḳh mire saath nahānā chāhe

aaj tak us ne nibhāyā nahīñ vā'da apnā

vo to har taur mire dil ko satānā chāhe

maiñ ne suljhā.e haiñ us shoḳh ke gesū aksar

ab isī jaal meñ mujh ko vo phañsānā chāhe

maiñ to samjhā thā faqat zehn kī taḳhlīq hai vo

vo to sach-much hī mire dil meñ samānā chāhe

us ne phailā.ī hai ḳhud apnī alālat kī ḳhabar

vo 'ziyā' mujh ko bahāne se bulānā chāhe

dil ke zaKHmon pe wo marham jo lagana chahe

wajibaat apne purane wo chukana chahe

meri aankhon ki samundar mein utarne wala

aisa lagta hai mujhe aur rulana chahe

dil ke aangan ki kaDi dhup mein ek doshiza

marmarin bhiga hua jism sikhana chahe

saikDon log the maujud sar-e-sahil-e-shauq

phir bhi wo shoKH mere sath nahana chahe

aaj tak us ne nibhaya nahin wa'da apna

wo to har taur mere dil ko satana chahe

main ne suljhae hain us shoKH ke gesu aksar

ab isi jal mein mujh ko wo phansana chahe

main to samjha tha faqat zehn ki taKHliq hai wo

wo to sach-much hi mere dil mein samana chahe

us ne phailai hai KHud apni alalat ki KHabar

wo 'ziya' mujh ko bahane se bulana chahe