dil ki barbaadi ke aasar abhi baqi hain

dil kī barbādī ke āsār abhī baaqī haiñ

kuchh shikasta dar-o-dīvār abhī baaqī haiñ

chand parvāne hī raqsāñ haiñ magar sham-e-hazīñ

shukr kar kuchh tire ġham-ḳhvār abhī baaqī haiñ

chand ġhunchoñ ke jigar sī ke rafūgar na bano

kitne dil haiñ jo dil-afgār abhī baaqī haiñ

vaqt aayā to tah-e-teġh bhī dohrā deñge

vo fasāne jo sar-e-dār abhī baaqī haiñ

ai mashīhāo kabhī ghar se nikal kar dekho

kis qadar shahr meñ bīmār abhī baaqī haiñ

sū-e-vīrāna nikal aa.e jo dīvāne to kyā

zehn meñ to dar-o-dīvār abhī baaqī haiñ

ḳhatm muusā pe kahāñ silsila-e-shauq huā

kitne hī tālib-e-dīdār abhī baaqī haiñ

mere dāman ko na dekho sar-e-mizhgāñ dekho

kis qadar abr-guhar-bār abhī baaqī haiñ

uqde khulte hī chale jaate haiñ har roz na.e

ġhāliban mahram-e-asrār abhī baaqī haiñ

uljhaneñ ham ko bhī darkār haiñ utnī jitne

tujh meñ ḳham kākul-e-ḳhamdār abhī baaqī haiñ

tinke tinke pe tirī yūrish-e-paiham phir bhī

āshiyāñ barq-e-sharar-bār abhī baaqī haiñ

kis meñ jur.at hai jo phūloñ pe nazar Daal sake

pāsbānī ke liye ḳhaar abhī baaqī haiñ

jo badal sakte haiñ mai-ḳhāne kā dastūr-e-kuhan

chand aise bhī to mai-ḳhvār abhī baaqī haiñ

dekh kar misr ke bāzār kī raunaq 'rāhī'

dil ye kahtā hai ḳharīdār abhī baaqī haiñ

dil ki barbaadi ke aasar abhi baqi hain

kuchh shikasta dar-o-diwar abhi baqi hain

chand parwane hi raqsan hain magar sham-e-hazin

shukr kar kuchh tere gham-KHwar abhi baqi hain

chand ghunchon ke jigar si ke rafugar na bano

kitne dil hain jo dil-afgar abhi baqi hain

waqt aaya to tah-e-tegh bhi dohra denge

wo fasane jo sar-e-dar abhi baqi hain

ai mashihao kabhi ghar se nikal kar dekho

kis qadar shahr mein bimar abhi baqi hain

su-e-virana nikal aae jo diwane to kya

zehn mein to dar-o-diwar abhi baqi hain

KHatm musa pe kahan silsila-e-shauq hua

kitne hi talib-e-didar abhi baqi hain

mere daman ko na dekho sar-e-mizhgan dekho

kis qadar abr-guhar-bar abhi baqi hain

uqde khulte hi chale jate hain har roz nae

ghaaliban mahram-e-asrar abhi baqi hain

uljhanen hum ko bhi darkar hain utni jitne

tujh mein KHam kakul-e-KHamdar abhi baqi hain

tinke tinke pe teri yurish-e-paiham phir bhi

aashiyan barq-e-sharar-bar abhi baqi hain

kis mein jurat hai jo phulon pe nazar Dal sake

pasbani ke liye KHar abhi baqi hain

jo badal sakte hain mai-KHane ka dastur-e-kuhan

chand aise bhi to mai-KHwar abhi baqi hain

dekh kar misr ke bazar ki raunaq 'rahi'

dil ye kahta hai KHaridar abhi baqi hain