dil ki raghbat hai jab aap hi ki taraf

dil kī raġhbat hai jab aap hī kī taraf

kis liye aañkh uThtī kisī kī taraf

kaisī uljhan he bāzī-gah-e-shauq meñ

ham haiñ in kī taraf vo kisī kī taraf

sirf ashk-o-tabassum meñ uljhe rahe

ham ne dekhā nahīñ zindagī kī taraf

ham jo ġhol-e-bayābāñ se vāqif nahīñ

chal diye duur kī raushnī kī taraf

dair-o-ka.aba se pyāsī jabīneñ liye

aa ga.e ham tirī bandagī kī taraf

raat Dhalte jab un kā ḳhayāl aa gayā

TukTukī bañdh ga.ī chāñdnī kī taraf

jab na qasd-e-ḳhudī ke darīche khule

ahl-e-dil ho liye be-ḳhudī kī taraf

ham ne dil kī lagī un se kī thī bayāñ

baat vo le ga.e dil-lagī kī taraf

jāda-e-āgahī par baḌī bhiiḌ thī

saikḌoñ muḌ ga.e gumrahī kī taraf

haiñ mire halqa-e-ilm meñ bil-yaqīñ

āsmāñ ke payām aadmī kī taraf

un ke jalvoñ kī jānib nazar uTh ga.ī

mauj thī baḌh ga.ī chāñdnī kī taraf

kaun sā jurm hai kyā sitam ho gayā

aañkh agar uTh ga.ī aap hī kī taraf

jaane vo multafit huuñ kidhar bazm meñ

āñsuoñ kī taraf yā hañsī kī taraf

us ke pindār-e-ḳhud-āgahī par na jā

dekh insāñ kī bechārgī kī taraf

apne māhaul meñ kyuuñ añdherā kareñ

der tak dekh kar raushnī kī taraf

maut kī raah āsān ho jā.egī

pyaar se dekhiye zindagī kī taraf

ham junūñ-mand bhī itne vāqif to haiñ

aql kā ruḳh hai vāraftagī kī taraf

shā.irī kī kisī manzil-e-dard meñ

ik darīcha hai paiġhambarī kī taraf

jaane āñkhoñ ne āñkhoñ se kyā kuchh kahā

zindagī jhuk ga.ī zindagī kī taraf

'dānish' inkār ḳhāliq se hotā nahīñ

dekhtā huuñ maiñ jab aadmī kī taraf

dil ki raghbat hai jab aap hi ki taraf

kis liye aankh uThti kisi ki taraf

kaisi uljhan he bazi-gah-e-shauq mein

hum hain in ki taraf wo kisi ki taraf

sirf ashk-o-tabassum mein uljhe rahe

hum ne dekha nahin zindagi ki taraf

hum jo ghol-e-bayaban se waqif nahin

chal diye dur ki raushni ki taraf

dair-o-kaba se pyasi jabinen liye

aa gae hum teri bandagi ki taraf

raat Dhalte jab un ka KHayal aa gaya

TukTuki bandh gai chandni ki taraf

jab na qasd-e-KHudi ke dariche khule

ahl-e-dil ho liye be-KHudi ki taraf

hum ne dil ki lagi un se ki thi bayan

baat wo le gae dil-lagi ki taraf

jada-e-agahi par baDi bhiD thi

saikDon muD gae gumrahi ki taraf

hain mere halqa-e-ilm mein bil-yaqin

aasman ke payam aadmi ki taraf

un ke jalwon ki jaanib nazar uTh gai

mauj thi baDh gai chandni ki taraf

kaun sa jurm hai kya sitam ho gaya

aankh agar uTh gai aap hi ki taraf

jaane wo multafit hun kidhar bazm mein

aansuon ki taraf ya hansi ki taraf

us ke pindar-e-KHud-agahi par na ja

dekh insan ki bechaargi ki taraf

apne mahaul mein kyun andhera karen

der tak dekh kar raushni ki taraf

maut ki rah aasan ho jaegi

pyar se dekhiye zindagi ki taraf

hum junun-mand bhi itne waqif to hain

aql ka ruKH hai waraftagi ki taraf

shairi ki kisi manzil-e-dard mein

ek daricha hai paighambari ki taraf

jaane aankhon ne aankhon se kya kuchh kaha

zindagi jhuk gai zindagi ki taraf

'danish' inkar KHaliq se hota nahin

dekhta hun main jab aadmi ki taraf