dil ki rudad nigahon se bayan hoti hai

dil kī rūdād nigāhoñ se bayāñ hotī hai

dard-mandoñ kī ḳhamoshī meñ zabāñ hotī hai

ḳhud-farāmosh na jab tak ho koī kyā samjhe

be-nishānī bhī mohabbat meñ nishāñ hotī hai

naqsh-e-ummīd haiñ ban ban ke bigaḌte kyā kyā

zindagī raqs-gah-e-reg-e-ravāñ hotī hai

jo tire husn-e-nazar-gīr se shādāb nahīñ

un bahāroñ ke muqaddar meñ ḳhizāñ hotī hai

vo burā vaqt mohabbat meñ na dekhe koī

jab mohabbat bhī tabī.at pe garāñ hotī hai

yuuñ bhī hotī hai tire ġham kī navāzish aksar

lab pe hotī hai hañsī dil meñ fuġhāñ hotī hai

jāñ-nisārī se hai tauqīr-e-mohabbat lekin

dekhnā ye hai ki takmīl kahāñ hotī hai

ham vahāñ ho ke bhī maujūd kahāñ hote haiñ

ham-nashīnoñ meñ tirī baat jahāñ hotī hai

chauñk uThtā hai ġham-e-hijr kā ehsās 'rishī'

un ke aane pe bhī taskīn kahāñ hotī hai

dil ki rudad nigahon se bayan hoti hai

dard-mandon ki KHamoshi mein zaban hoti hai

KHud-faramosh na jab tak ho koi kya samjhe

be-nishani bhi mohabbat mein nishan hoti hai

naqsh-e-ummid hain ban ban ke bigaDte kya kya

zindagi raqs-gah-e-reg-e-rawan hoti hai

jo tere husn-e-nazar-gir se shadab nahin

un bahaaron ke muqaddar mein KHizan hoti hai

wo bura waqt mohabbat mein na dekhe koi

jab mohabbat bhi tabiat pe garan hoti hai

yun bhi hoti hai tere gham ki nawazish aksar

lab pe hoti hai hansi dil mein fughan hoti hai

jaan-nisari se hai tauqir-e-mohabbat lekin

dekhna ye hai ki takmil kahan hoti hai

hum wahan ho ke bhi maujud kahan hote hain

ham-nashinon mein teri baat jahan hoti hai

chaunk uThta hai gham-e-hijr ka ehsas 'rishi'

un ke aane pe bhi taskin kahan hoti hai