dil ki zamin se kaun si behtar zamin hai

dil kī zamīñ se kaun sī behtar zamīn hai

par jaan tū bhī ho to ajab sar-zamīn hai

sar ko na pheñk apne falak par ġhurūr se

tū ḳhaak se banā hai tirā ghar zamīn hai

rotā phirā hai kaun ye sar-gashta ai falak

jīdhar nazar paḌe hai udhar tar zamīn hai

ā.īne kī tarah se nazar hai tū dekh le

raushan-diloñ kī ghar kī munavvar zamīn hai

shāyad nahā ke aaj nichoḌī hai tū ne zulf

ghar kī tamām terī muambar zamīn hai

giitī ne zer-e-charḳh rakhā hai sabhoñ ko thaam

is kashtī-e-jahān kī lañgar zamīn hai

le dil se chashm tak mire dariyā sā hai bharā

donoñ gharoñ kī ġharq sarāsar zamīn hai

avval yahī hai bā.is-e-ḳhūñ-rezī-e-jahāñ

zevar hai zan hai zor hai yā zan zamīn hai

is tañgnā-e-dahr se jā.ūñ kidhar nikal

ūdhar hai āsmān aur īdhar zamīn hai

juz ḳhūn-e-kohkan na uge vaañ se koī gul

shīrīñ kī rāh-e-ishq kī patthar zamīn hai

rauñde ho naqsh-e-pā kī tarah jis ko tum 'hasan'

dekhoge koī din yahī sar par zamīn hai

dil ki zamin se kaun si behtar zamin hai

par jaan tu bhi ho to ajab sar-zamin hai

sar ko na phenk apne falak par ghurur se

tu KHak se bana hai tera ghar zamin hai

rota phira hai kaun ye sar-gashta ai falak

jidhar nazar paDe hai udhar tar zamin hai

aaine ki tarah se nazar hai tu dekh le

raushan-dilon ki ghar ki munawwar zamin hai

shayad naha ke aaj nichoDi hai tu ne zulf

ghar ki tamam teri muambar zamin hai

giti ne zer-e-charKH rakha hai sabhon ko tham

is kashti-e-jahan ki langar zamin hai

le dil se chashm tak mere dariya sa hai bhara

donon gharon ki gharq sarasar zamin hai

awwal yahi hai bais-e-KHun-rezi-e-jahan

zewar hai zan hai zor hai ya zan zamin hai

is tangna-e-dahr se jaun kidhar nikal

udhar hai aasman aur idhar zamin hai

juz KHun-e-kohkan na uge wan se koi gul

shirin ki rah-e-ishq ki patthar zamin hai

raunde ho naqsh-e-pa ki tarah jis ko tum 'hasan'

dekhoge koi din yahi sar par zamin hai