dil ko har aish se begana bana kar chhoDa

dil ko har aish se begāna banā kar chhoḌā

tum ne āḳhir ise dīvāna banā kar chhoḌā

do nigāhoñ kā tasādum to koī baat na thī

us kā bhī logoñ ne afsāna banā kar chhoḌā

sehn-e-gulshan meñ tarab-ḳhez bahār aate hī

ham ne har phuul ko paimāna banā kar chhoḌā

saikḌoñ tarah ke but is meñ ikaTThā kar ke

ka.aba-e-dil ko bhī but-ḳhāna banā kar chhoḌā

ālam-e-shauq meñ parvāz ke matvāloñ ko

azm-e-bebāk ne parvāna banā kar chhoḌā

dil kā thoḌā sā lahū is meñ milā kar ham ne

ashk-e-be-dard ko durdāna banā kar chhoḌā

'manshā' is daur meñ hastī kī girāñbārī ne

achchhe-achchhoñ ko bhī dīvāna banā kar chhoḌā

dil ko har aish se begana bana kar chhoDa

tum ne aaKHir ise diwana bana kar chhoDa

do nigahon ka tasadum to koi baat na thi

us ka bhi logon ne afsana bana kar chhoDa

sehn-e-gulshan mein tarab-KHez bahaar aate hi

hum ne har phul ko paimana bana kar chhoDa

saikDon tarah ke but is mein ikaTTha kar ke

kaba-e-dil ko bhi but-KHana bana kar chhoDa

aalam-e-shauq mein parwaz ke matwalon ko

azm-e-bebak ne parwana bana kar chhoDa

dil ka thoDa sa lahu is mein mila kar hum ne

ashk-e-be-dard ko durdana bana kar chhoDa

'mansha' is daur mein hasti ki giranbari ne

achchhe-achchhon ko bhi diwana bana kar chhoDa