dil ko zara qarar tha wo bhi nahin raha

dil ko zarā qarār thā vo bhī nahīñ rahā

āñkhoñ ko intizār thā vo bhī nahīñ rahā

vo saath thā to saath meñ merī bhī zaat thī

merā kahīñ shumār thaa, vo bhī nahīñ rahā

us se judā hue haiñ to ḳhud ko bhī kho diyā

ḳhud par jo e'tibār thā vo bhī nahīñ rahā

dāman meñ koī chāñd, sitāra na āftāb

jugnū par inhisār thā vo bhī nahīñ rahā

jhelī thiiñ jis ke sang hī ye ranjisheñ kabhī

ik dil hī ġham-gusār thā vo bhī nahīñ rahā

uljhā thā mere dil meñ jo muddat se ik savāl

lab par jo baar baar thā vo bhī nahīñ rahā

jis par charāġh roz jalātī thī raat ko

dil meñ jo ik mazār thā vo bhī nahīñ rahā

muddat se us kī raah meñ dil thā bichhā huā

sochoñ meñ vasl-e-yār thā vo bhī nahīñ rahā

taqdīr kī asiir huuñ jis ke liye ye dil

muddat se ashk-bār thā vo bhī nahīñ rahā

mā'būd mere merā muqaddar tū dekh le

ḳhud par jo iḳhtiyār thā vo bhī nahīñ rahā

dil ko zara qarar tha wo bhi nahin raha

aankhon ko intizar tha wo bhi nahin raha

wo sath tha to sath mein meri bhi zat thi

mera kahin shumar tha, wo bhi nahin raha

us se juda hue hain to KHud ko bhi kho diya

KHud par jo e'tibar tha wo bhi nahin raha

daman mein koi chand, sitara na aaftab

jugnu par inhisar tha wo bhi nahin raha

jheli thin jis ke sang hi ye ranjishen kabhi

ek dil hi gham-gusar tha wo bhi nahin raha

uljha tha mere dil mein jo muddat se ek sawal

lab par jo bar bar tha wo bhi nahin raha

jis par charagh roz jalati thi raat ko

dil mein jo ek mazar tha wo bhi nahin raha

muddat se us ki rah mein dil tha bichha hua

sochon mein wasl-e-yar tha wo bhi nahin raha

taqdir ki asir hun jis ke liye ye dil

muddat se ashk-bar tha wo bhi nahin raha

ma'bud mere mera muqaddar tu dekh le

KHud par jo iKHtiyar tha wo bhi nahin raha