dil kuchh samajh saka na muamme janab ke

dil kuchh samajh sakā na muamme janāb ke

andāz hī ajab haiñ savāl-o-javāb ke

dil le ke merā ishq kī sauġhāt baḳhsh dī

qurbān jā.iye karam-e-be-hisāb ke

kal kā.enāt-e-husn nahīñ husn-e-kā.enāt

ruḳh aur bhī haiñ jalva-e-zer-e-naqāb ke

har ḳhūn-e-ārzū se na.e hausle mile

mamnūn ham haiñ koshish-e-nā-kāmyāb ke

jān-e-azīz de ke hayāt-e-davām lī

zinda huuñ kyuuñ na maare hue inqalāb ke

vaa.iz tirā ḳhudā.ī kā da.avā nahīñ gunāh

kartā hai aaj faisle roz-e-hisāb ke

kyuuñ kar na munfarid hoñ 'ḳhayālī' ġhazal ke sher

aurāq muntashir haiñ ye dil kī kitāb ke

dil kuchh samajh saka na muamme janab ke

andaz hi ajab hain sawal-o-jawab ke

dil le ke mera ishq ki saughat baKHsh di

qurban jaiye karam-e-be-hisab ke

kal kaenat-e-husn nahin husn-e-kaenat

ruKH aur bhi hain jalwa-e-zer-e-naqab ke

har KHun-e-arzu se nae hausle mile

mamnun hum hain koshish-e-na-kaamyab ke

jaan-e-aziz de ke hayat-e-dawam li

zinda hun kyun na mare hue inqalab ke

waiz tera KHudai ka dawa nahin gunah

karta hai aaj faisle roz-e-hisab ke

kyun kar na munfarid hon 'KHayali' ghazal ke sher

auraq muntashir hain ye dil ki kitab ke