dil lagaya aap se bekar hi

dil lagāyā aap se bekār hī

ham hue āḳhir zalīl-o-ḳhvār hī

vo rahā mahfil meñ naġhma-bār hī

chal basā koī pas-e-dīvār hī

maiñ samajhtā huuñ jise shabnam sifat

hai haqīqat meñ vo sho.ala-bār hī

mushkiloñ meñ ġhair kuchh kaam aa.e haiñ

aur tamāshā-bīñ rahe ġham-ḳhvār hī

apnī nākāmī kā hai afsos kab

bā.is-e-shohrat huī jab haar hī

shaiḳh sāhab bhī nahīñ jo kar sake

kar gayā vo ek bāda-ḳhvār hī

hai tumhāre vāste behtar 'nadīm'

kū-e-jānāñ se farāz-e-dār hī

dil lagaya aap se bekar hi

hum hue aaKHir zalil-o-KHwar hi

wo raha mahfil mein naghma-bar hi

chal basa koi pas-e-diwar hi

main samajhta hun jise shabnam sifat

hai haqiqat mein wo shoala-bar hi

mushkilon mein ghair kuchh kaam aae hain

aur tamasha-bin rahe gham-KHwar hi

apni nakaami ka hai afsos kab

bais-e-shohrat hui jab haar hi

shaiKH sahab bhi nahin jo kar sake

kar gaya wo ek baada-KHwar hi

hai tumhaare waste behtar 'nadim'

ku-e-jaanan se faraaz-e-dar hi