dil le chala hai bandh ke dilbar ke ru-ba-ru

dil le chalā hai bāñdh ke dilbar ke rū-ba-rū

jaatā hai ik asiir sitamgar ke rū-ba-rū

us but meñ ik ḳhudā.ī kā jalva hai varna shaiḳh

sajde kiye se fā.eda patthar ke rū-ba-rū

aañsū bahā rahā huuñ ḳhat-e-yār paḌh ke maiñ

yuuñ daana Dāltā huuñ kabūtar ke rū-ba-rū

hāsil huī bhī aql-e-falātūñ agar to kyā

chaltī nahīñ kisī kī muqaddar ke rū-ba-rū

ai 'dāġh' hogā ham se kisī kā javāb kyā

miqdār-e-chashm kyā hai samundar ke rū-ba-rū

dil le chala hai bandh ke dilbar ke ru-ba-ru

jata hai ek asir sitamgar ke ru-ba-ru

us but mein ek KHudai ka jalwa hai warna shaiKH

sajde kiye se faeda patthar ke ru-ba-ru

aansu baha raha hun KHat-e-yar paDh ke main

yun dana Dalta hun kabutar ke ru-ba-ru

hasil hui bhi aql-e-falatun agar to kya

chalti nahin kisi ki muqaddar ke ru-ba-ru

ai 'dagh' hoga hum se kisi ka jawab kya

miqdar-e-chashm kya hai samundar ke ru-ba-ru