dil mein apne jo sada KHauf-e-KHuda rakhta hun

dil meñ apne jo sadā ḳhauf-e-ḳhudā rakhtā huuñ

but-kade vāloñ ko har-ān ḳhafā rakhtā huuñ

merī shorīda-mizājī kā sabab mat pūchho

maiñ huuñ dīvāna har andāz judā rakhtā huuñ

yuuñ to barbād kiyā ahl-e-jahāñ ne lekin

apne hoñToñ pe sadā harf-e-du'ā rakhtā huuñ

mujh ko qātil kā nahīñ ḳhauf kisī bhī sūrat

sach to ye hai ki maiñ bismil kī adā rakhtā huuñ

jalne-bujhne kā mujhe ḳhauf bhalā kyūñkar ho

jab charāġh apnā yahāñ apnī havā rakhtā huuñ

tū nazar dekh rahā hai tujhe kyā dil kī ḳhabar

in nigāhoñ ke sivā dil meñ hayā rakhtā huuñ

jo mirī ruuh kī taskīn hai dil kī ThanDak

us ko siine meñ jahāñ bhar se chhupā rakhtā huuñ

mujh ko nafrat ke añdheroñ kā nahīñ Dar 'manzar'

dil meñ ulfat kā diyā maiñ bhī jalā rakhtā huuñ

dil mein apne jo sada KHauf-e-KHuda rakhta hun

but-kade walon ko har-an KHafa rakhta hun

meri shorida-mizaji ka sabab mat puchho

main hun diwana har andaz juda rakhta hun

yun to barbaad kiya ahl-e-jahan ne lekin

apne honTon pe sada harf-e-du'a rakhta hun

mujh ko qatil ka nahin KHauf kisi bhi surat

sach to ye hai ki main bismil ki ada rakhta hun

jalne-bujhne ka mujhe KHauf bhala kyunkar ho

jab charagh apna yahan apni hawa rakhta hun

tu nazar dekh raha hai tujhe kya dil ki KHabar

in nigahon ke siwa dil mein haya rakhta hun

jo meri ruh ki taskin hai dil ki ThanDak

us ko sine mein jahan bhar se chhupa rakhta hun

mujh ko nafrat ke andheron ka nahin Dar 'manzar'

dil mein ulfat ka diya main bhi jala rakhta hun