dil mein gham ki kani nahin hoti

dil meñ ġham kī kanī nahīñ hotī

zindagī zindagī nahīñ hotī

sirf hoñToñ pe jo bikhar jaa.e

vo hañsī to hañsī nahīñ hotī

dil to rotā hai ḳhuun ke aañsū

aañkh meñ go namī nahīñ hotī

garche har dam vo paas rahte haiñ

hasratoñ meñ kamī nahīñ hotī

tere qadmoñ pe jis kā dam nikle

is se baḌh kar ḳhushī nahīñ hotī

tere uThte hī bazm-e-rindāñ se

duur tak raushnī nahīñ hotī

ik tahī-jām aur ik sarshār

yuuñ to sāqī-garī nahīñ hotī

dil-e-āshiq hai pur-bahār 'habīb'

yaañ ḳhizāñ hī kabhī nahīñ hotī

dil mein gham ki kani nahin hoti

zindagi zindagi nahin hoti

sirf honTon pe jo bikhar jae

wo hansi to hansi nahin hoti

dil to rota hai KHun ke aansu

aankh mein go nami nahin hoti

garche har dam wo pas rahte hain

hasraton mein kami nahin hoti

tere qadmon pe jis ka dam nikle

is se baDh kar KHushi nahin hoti

tere uThte hi bazm-e-rindan se

dur tak raushni nahin hoti

ek tahi-jam aur ek sarshaar

yun to saqi-gari nahin hoti

dil-e-ashiq hai pur-bahaar 'habib'

yan KHizan hi kabhi nahin hoti