dil mein iman to hai jazba-e-iman na sahi

dil meñ īmān to hai jazba-e-īmāñ na sahī

ham musalmān to haiñ shān-e-musalmāñ na sahī

rab kī rahmat kā sahārā hī hameñ kaafī hai

aaj duniyā meñ koī apnā nigahbāñ na sahī

tiin sau terah ne ye badr meñ paiġhām diyā

azm-o-īmān hai to jang kā sāmāñ na sahī

ham to haiñ aaj bhī taz.īn-e-gulistāñ meñ sharīk

apne hāthoñ meñ nahīñ nazm-e-gulistāñ na sahī

aslahoñ kī mire qātil ko zarūrat kyā hai

tīr-e-mizhgāñ hai bahut ḳhanjar-o-paikāñ na sahī

maiñ ne palkoñ pe sajā rakkhe haiñ ashkoñ ke charāġh

mere TuuTe hue chhappar meñ charāġhāñ na sahī

māl-o-zar paas nahīñ tosha-e-ulfat ke sivā

koī sāmān to hai ziist kā sāmāñ na sahī

aaj kī shab kisī bhūke kī ziyāfat kar de

ghar meñ tere nahīñ 'ahsan' koī mehmāñ na sahī

dil mein iman to hai jazba-e-iman na sahi

hum musalman to hain shan-e-musalman na sahi

rab ki rahmat ka sahaara hi hamein kafi hai

aaj duniya mein koi apna nigahban na sahi

tin sau terah ne ye badr mein paigham diya

azm-o-iman hai to jang ka saman na sahi

hum to hain aaj bhi tazin-e-gulistan mein sharik

apne hathon mein nahin nazm-e-gulistan na sahi

aslahon ki mere qatil ko zarurat kya hai

tir-e-mizhgan hai bahut KHanjar-o-paikan na sahi

main ne palkon pe saja rakkhe hain ashkon ke charagh

mere TuTe hue chhappar mein charaghan na sahi

mal-o-zar pas nahin tosha-e-ulfat ke siwa

koi saman to hai zist ka saman na sahi

aaj ki shab kisi bhuke ki ziyafat kar de

ghar mein tere nahin 'ahsan' koi mehman na sahi