dil mein ek Tis uThi aankh mein aansu jage

dil meñ ik Tiis uThī aañkh meñ aañsū jaage

shaam hote hī tirī yaad ke jugnū jaage

aur ho jā.egī bāġhoñ kī fazā itr-afshāñ

tū agar aa.e to sahrāoñ meñ ḳhushbū jaage

khul agar jaa.eñ siyah-mast ghanere gesū

saare māhaul meñ bangāl kā jaadū jaage

merī tanhā.ī meñ shahnā.ī huī hai shāmil

jab kahīñ duur kisī paañv meñ ghuñghrū jaage

luuT kar niiñd mirī chain se sone vaale

kaash vo aa.e ghaḌī merī tarah tū jaage

ho gayā baḳht-e-surayyā mirī qismat pe nisār

mere shānoñ pe tire surma.ī gesū jaage

sub.h-dam baaġh meñ khiltī hai kalī yuuñ 'tālib'

ik hasīñ ḳhvāb se jaise koī māh-rū jaage

dil mein ek Tis uThi aankh mein aansu jage

sham hote hi teri yaad ke jugnu jage

aur ho jaegi baghon ki faza itr-afshan

tu agar aae to sahraon mein KHushbu jage

khul agar jaen siyah-mast ghanere gesu

sare mahaul mein bangal ka jadu jage

meri tanhai mein shahnai hui hai shamil

jab kahin dur kisi panw mein ghunghru jage

luT kar nind meri chain se sone wale

kash wo aae ghaDi meri tarah tu jage

ho gaya baKHt-e-surayya meri qismat pe nisar

mere shanon pe tere surmai gesu jage

subh-dam bagh mein khilti hai kali yun 'talib'

ek hasin KHwab se jaise koi mah-ru jage