dil mein mahbub ka ghar ho to ghazal hoti hai

dil meñ mahbūb kā ghar ho to ġhazal hotī hai

koī masjūd-e-nazar ho to ġhazal hotī hai

naġhma hotā hai javāñ rang-e-shikast-e-dil se

aañkh jab ḳhuun se tar ho to ġhazal hotī hai

soz fariyād meñ aa.e to kahāñ se aa.e

tapish-e-soz-e-jigar ho to ġhazal hotī hai

zikr-e-mahbūb hai pāband-e-taqaddus kitnā

bā-vazū aañkh agar ho to ġhazal hotī hai

tīrgī ho to sitāroñ pe nikhār aatā hai

shaam mahrūm-e-sahar ho to ġhazal hotī hai

nigah-e-shauq meñ kaunain simaT aate haiñ

donoñ aalam kī ḳhabar ho to ġhazal hotī hai

raas aatī nahīñ is phuul ko gulshan kī havā

zindagī ḳhāk-basar ho to ġhazal hotī hai

husn rangīnī-e-ash.ār kā sar-chashma hai

husn kā dil pe asar ho to ġhazal hotī hai

dil kī duniyā jise kahte haiñ vo duniyā hī 'tufail'

dost kī rāhguzar ho to ġhazal hotī hai

dil mein mahbub ka ghar ho to ghazal hoti hai

koi masjud-e-nazar ho to ghazal hoti hai

naghma hota hai jawan rang-e-shikast-e-dil se

aankh jab KHun se tar ho to ghazal hoti hai

soz fariyaad mein aae to kahan se aae

tapish-e-soz-e-jigar ho to ghazal hoti hai

zikr-e-mahbub hai paband-e-taqaddus kitna

ba-wazu aankh agar ho to ghazal hoti hai

tirgi ho to sitaron pe nikhaar aata hai

sham mahrum-e-sahar ho to ghazal hoti hai

nigah-e-shauq mein kaunain simaT aate hain

donon aalam ki KHabar ho to ghazal hoti hai

ras aati nahin is phul ko gulshan ki hawa

zindagi KHak-basar ho to ghazal hoti hai

husn rangini-e-ashaar ka sar-chashma hai

husn ka dil pe asar ho to ghazal hoti hai

dil ki duniya jise kahte hain wo duniya hi 'tufail'

dost ki rahguzar ho to ghazal hoti hai