dil mein tir-e-ishq hai aur farq par shamshir-e-ishq

dil meñ tīr-e-ishq hai aur farq par shamshīr-e-ishq

kyā batā.eñ paḌ ga.ī hai paañv meñ zanjīr-e-ishq

dekhne vaale ye kahte haiñ kitāb-e-dahr meñ

tū sarāpā husn kā naqsha hai maiñ tasvīr-e-ishq

kohkan aur qais mil jaa.eñ to maiñ un se kahūñ

le ga.e kyā saath hī qabroñ meñ tum tāsīr-e-ishq

vāh-re insāf itnā bhī na vaañ pūchhā gayā

ye qusūr-e-husn hai yā asl meñ tāsīr-e-ishq

baat karne se bhī nafrat ho ga.ī dildār ko

vāh-re iz.hār-e-ulfat vāh-re tāsīr-e-ishq

kyā sabab kyā vaj.h kyuuñ aa kar nikal jaa.e shikār

kyuuñ nishāna par na jā.egā hamārā tīr-e-ishq

pahle apnā sar qalam karvā.e phir tayyār ho

har kisī kā kaam hai jo likh sake tafsīr-e-ishq

daulat-e-dīdār hasb-e-mudda.ā hāsil huī

mil ga.ī jis shaḳhs ko taqdīr se iksīr-e-ishq

husn-e-jānāñ kī kashish duniyā meñ baaqī rah ga.ī

bad-nasībī se hamārī uḌ ga.ī tāsīr-e-ishq

tū bhī gul ke aa.ine par khīñch de tasvīr-e-husn

maiñ bhī bulbul ko sunā.ūñ baaġh meñ taqrīr-e-ishq

kyā shikāyat us kī 'parvīñ' ye to hotī aa.ī hai

pahle ulfat kī thī 'izzat aur na ab tauqīr-e-ishq

dil mein tir-e-ishq hai aur farq par shamshir-e-ishq

kya bataen paD gai hai panw mein zanjir-e-ishq

dekhne wale ye kahte hain kitab-e-dahr mein

tu sarapa husn ka naqsha hai main taswir-e-ishq

kohkan aur qais mil jaen to main un se kahun

le gae kya sath hi qabron mein tum tasir-e-ishq

wah-re insaf itna bhi na wan puchha gaya

ye qusur-e-husn hai ya asl mein tasir-e-ishq

baat karne se bhi nafrat ho gai dildar ko

wah-re izhaar-e-ulfat wah-re tasir-e-ishq

kya sabab kya wajh kyun aa kar nikal jae shikar

kyun nishana par na jaega hamara tir-e-ishq

pahle apna sar qalam karwae phir tayyar ho

har kisi ka kaam hai jo likh sake tafsir-e-ishq

daulat-e-didar hasb-e-muddaa hasil hui

mil gai jis shaKHs ko taqdir se iksir-e-ishq

husn-e-jaanan ki kashish duniya mein baqi rah gai

bad-nasibi se hamari uD gai tasir-e-ishq

tu bhi gul ke aaine par khinch de taswir-e-husn

main bhi bulbul ko sunaun bagh mein taqrir-e-ishq

kya shikayat us ki 'parwin' ye to hoti aai hai

pahle ulfat ki thi 'izzat aur na ab tauqir-e-ishq