dil mein wo the dil tha raushan ab KHuda ka nam hai

dil meñ vo the dil thā raushan ab ḳhudā kā naam hai

vo thā āġhāz-e-mohabbat aur ye anjām hai

zabt-e-ġham kā silsila ab juzv-e-hastī ban gayā

chāhe jo kuchh bhī kareñ vo mere sar ilzām hai

bistar-e-gul par jo mahv-e-ḳhvāb haiñ vo jāneñ kyā

zindagī ḳhār-e-alam hai teġh-e-ḳhūñ-āshām hai

husn ko sanjāb-o-maḳhmal ishq ko jāma-darī

bārgāh-e-haq se ulfat kā yahī in.aam hai

ḳhaam hai jis kā shu.ūr-e-zindagī jaane vo kyā

har hasīñ shai meñ ḳhushī kā aaj bhī paiġhām hai

jalva-hā-e-rang-o-bū kyā dāvat-e-fikr-o-nazar

zindagī kyā hai musalsal justujū kā naam hai

ḳhuun jab ġhunchoñ kā hotā hai to khilte haiñ gulāb

parda-e-taḳhrīb meñ ta.amīr kā paiġhām hai

chashm-e-insāñ meñ huī taqdīr-e-ālam be-hijāb

markaz-e-tasḳhīr ab to charḳh-e-nīlī-fām hai

zindagī kā raaz kyā hai yā fanā kyā chiiz hai

tū 'payāmī' ramz samjhe ye ḳhayāl-e-ḳhām hai

dil mein wo the dil tha raushan ab KHuda ka nam hai

wo tha aaghaz-e-mohabbat aur ye anjam hai

zabt-e-gham ka silsila ab juzw-e-hasti ban gaya

chahe jo kuchh bhi karen wo mere sar ilzam hai

bistar-e-gul par jo mahw-e-KHwab hain wo jaanen kya

zindagi KHar-e-alam hai tegh-e-KHun-asham hai

husn ko sanjab-o-maKHmal ishq ko jama-dari

bargah-e-haq se ulfat ka yahi inam hai

KHam hai jis ka shuur-e-zindagi jaane wo kya

har hasin shai mein KHushi ka aaj bhi paigham hai

jalwa-ha-e-rang-o-bu kya dawat-e-fikr-o-nazar

zindagi kya hai musalsal justuju ka nam hai

KHun jab ghunchon ka hota hai to khilte hain gulab

parda-e-taKHrib mein tamir ka paigham hai

chashm-e-insan mein hui taqdir-e-alam be-hijab

markaz-e-tasKHir ab to charKH-e-nili-fam hai

zindagi ka raaz kya hai ya fana kya chiz hai

tu 'payami' ramz samjhe ye KHayal-e-KHam hai