dil mein yaad-e-but-e-be-pir liye baiTha hun

dil meñ yād-e-but-e-be-pīr liye baiThā huuñ

yaanī ik zulm kī tasvīr liye baiThā huuñ

aah meñ dard kī tāsīr liye baiThā huuñ

dil meñ ik ḳhuun bharā tiir liye baiThā huuñ

ik zarā sī ḳhalish-e-dard-e-jigar par ye ghamanD

jaise kul ishq kī jāgīr liye baiThā huuñ

hai mujhe sāz-e-tarab soḳhta-sāmāni-e-dil

parda-e-ḳhāk meñ iksīr liye baiThā huuñ

chuur shīshe pe nazar paḌte hī dil yaad aayā

miTne vaale tirī tasvīr liye baiThā huuñ

qaid ko toḌ ke samjhā ki sahārā toḌā

haath meñ paañv kī zanjīr liye baiThā huuñ

'ārzū' ho chukī sau martaba duniyā bedār

aur maiñ soī huī taqdīr liye baiThā huuñ

dil mein yaad-e-but-e-be-pir liye baiTha hun

yani ek zulm ki taswir liye baiTha hun

aah mein dard ki tasir liye baiTha hun

dil mein ek KHun bhara tir liye baiTha hun

ek zara si KHalish-e-dard-e-jigar par ye ghamanD

jaise kul ishq ki jagir liye baiTha hun

hai mujhe saz-e-tarab soKHta-samani-e-dil

parda-e-KHak mein iksir liye baiTha hun

chur shishe pe nazar paDte hi dil yaad aaya

miTne wale teri taswir liye baiTha hun

qaid ko toD ke samjha ki sahaara toDa

hath mein panw ki zanjir liye baiTha hun

'arzu' ho chuki sau martaba duniya bedar

aur main soi hui taqdir liye baiTha hun