dil mera saghar-e-shikayat hai

dil mirā sāġhar-e-shikāyat hai

zahr-e-ġham bas ki be-nihāyat hai

vo bhaveñ mujh pe kyuuñ na zulm kareñ

chashm-e-ḳhūñ-rez kī himāyat hai

dev mujh laakh daam kī jāgīr

zulf kholo baḌī ri'āyat hai

naqd-e-dīdār bul-havas kuuñ na dev

is meñ sarkār kī kifāyat hai

be-gunāhoñ kuuñ qatl karne par

muftī-e-nāz kī rivāyat hai

haikal-e-laḳht-e-dil meñ harf-e-vafā

murshid-e-ishq kī 'ināyat hai

sham'-rū sun bayān-e-soz-e-'sirāj'

ki 'ajab dard kī hikāyat hai

dil mera saghar-e-shikayat hai

zahr-e-gham bas ki be-nihayat hai

wo bhawen mujh pe kyun na zulm karen

chashm-e-KHun-rez ki himayat hai

dew mujh lakh dam ki jagir

zulf kholo baDi ri'ayat hai

naqd-e-didar bul-hawas kun na dew

is mein sarkar ki kifayat hai

be-gunahon kun qatl karne par

mufti-e-naz ki riwayat hai

haikal-e-laKHt-e-dil mein harf-e-wafa

murshid-e-ishq ki 'inayat hai

sham'-ru sun bayan-e-soz-e-'siraj'

ki 'ajab dard ki hikayat hai