dil mubtala-e-lazzat-e-azar hi raha

dil mubtalā-e-lazzat-e-āzār hī rahā

marnā firāq-e-yār meñ dushvār hī rahā

har dam ye shauq thā use qurbān kījiye

maiñ vasl meñ bhī jaan se be-zār hī rahā

ehsān-e-afv-e-jurm se vo sharmsār huuñ

baḳhshā gayā maiñ to bhī gunahgār hī rahā

hotī haiñ har tarah se mirī pāsdāriyāñ

dushman ke paas bhī vo mirā yaar hī rahā

din pahluoñ se Taal diyā kuchh na kah sake

har chand un ko vasl kā inkār hī rahā

zāhid kī tauba tauba rahī ghūñT ghūñT par

sau botaleñ uḌā ke bhī hushyār hī rahā

dekhīñ hazār rashk-e-masīhā kī sūrateñ

achchhā rahā jo ishq kā bīmār hī rahā

sadqe meñ tum ne chhoḌ diye haiñ bahut asiir

maiñ bhī rihā huā ki giraftār hī rahā

lazzat vafā meñ hai na kisī kī jafā meñ hai

dildār hī rahā na dil-āzār hī rahā

jalve ke baad vasl kī ḳhvāhish zarūr thī

vo kyā rahā jo āshiq-e-dīdār hī rahā

kahte haiñ jal ke ġhair mohabbat se 'dāġh' kī

māshūq us ke paas vafādār hī rahā

dil mubtala-e-lazzat-e-azar hi raha

marna firaq-e-yar mein dushwar hi raha

har dam ye shauq tha use qurban kijiye

main wasl mein bhi jaan se be-zar hi raha

ehsan-e-afw-e-jurm se wo sharmsar hun

baKHsha gaya main to bhi gunahgar hi raha

hoti hain har tarah se meri pasdariyan

dushman ke pas bhi wo mera yar hi raha

din pahluon se Tal diya kuchh na kah sake

har chand un ko wasl ka inkar hi raha

zahid ki tauba tauba rahi ghunT ghunT par

sau botalen uDa ke bhi hushyar hi raha

dekhin hazar rashk-e-masiha ki suraten

achchha raha jo ishq ka bimar hi raha

sadqe mein tum ne chhoD diye hain bahut asir

main bhi riha hua ki giraftar hi raha

lazzat wafa mein hai na kisi ki jafa mein hai

dildar hi raha na dil-azar hi raha

jalwe ke baad wasl ki KHwahish zarur thi

wo kya raha jo aashiq-e-didar hi raha

kahte hain jal ke ghair mohabbat se 'dagh' ki

mashuq us ke pas wafadar hi raha