dil mutmain nahin hai nazar mutmain nahin

dil mutma.in nahīñ hai nazar mutma.in nahīñ

is daur-e-ibtilā meñ bashar mutma.in nahīñ

kaif-e-bahār bazm-e-tarab raqs-e-jām-e-mai

kis kaam ke haiñ dil hī agar mutma.in nahīñ

aalam kisī ke tīr-e-nazar kā shikār hai

phir bhī kisī kā tīr-e-nazar mutma.in nahīñ

kyā jaane kis maqām pe ye saath chhoḌ deñ

in rahbaroñ se ahl-e-safar mutma.in nahīñ

sau baar āshiyāna jalāne ke bāvajūd

merī taraf se barq-o-sharar mutma.in nahīñ

faizān-e-jalva aur zarā aam kījiye

dil ko to hai yaqīn-e-nazar mutma.in nahīñ

'maikash' ko mai-kada meñ bhī ġham se nahīñ mafar

haiñ bāda-ḳhvār jam.a magar mutma.in nahīñ

dil mutmain nahin hai nazar mutmain nahin

is daur-e-ibtila mein bashar mutmain nahin

kaif-e-bahaar bazm-e-tarab raqs-e-jam-e-mai

kis kaam ke hain dil hi agar mutmain nahin

aalam kisi ke tir-e-nazar ka shikar hai

phir bhi kisi ka tir-e-nazar mutmain nahin

kya jaane kis maqam pe ye sath chhoD den

in rahbaron se ahl-e-safar mutmain nahin

sau bar aashiyana jalane ke bawajud

meri taraf se barq-o-sharar mutmain nahin

faizan-e-jalwa aur zara aam kijiye

dil ko to hai yaqin-e-nazar mutmain nahin

'maikash' ko mai-kada mein bhi gham se nahin mafar

hain baada-KHwar jama magar mutmain nahin