dil na diwana ho ye usko gawara bhi nahin

dil na dīvāna ho ye us ko gavārā bhī nahīñ

chaak dāmān-o-girebāñ hoñ ye iimā bhī nahīñ

ham liye jā.eñge kuchh us kā bharosa bhī nahīñ

jaan de deñ ye mohabbat kā taqāzā bhī nahīñ

be-niyāz aap se ho jaa.eñ ye hotā bhī nahīñ

dil hī jab dekhte haiñ koī tamannā bhī nahīñ

jaan be-tāb sī rahtī hai ki ho jaa.e nisār

aañkh bhar kar abhī ham ne use dekhā bhī nahīñ

zaḳhm baḌhtā bhī nahīñ faisla jis se ho jaa.e

tiir vo dil meñ lagā hai ki nikaltā bhī nahīñ

be-hijābī bhī nahīñ vo ki jo hosh uḌ jaa.eñ

hosh rah jaa.eñ Thikāne hī dar-parda bhī nahīñ

chain paḌtā hī nahīñ hai kisī karvaT ham ko

ḳhaar siine meñ chhupā huuñ koī aisā bhī nahīñ

phir bhī dil hai ki usī par hue jaatā hai nisār

aañkh uThā kar kabhī jis ne hameñ dekhā bhī nahīñ

zarre zarre pe bahār aa ga.ī dil meñ bhī bahār

jazba-e-shauq hamārā abhī bhaḌkā bhī nahīñ

paañv rakhte bhī nahīñ aap baḌhe jaate haiñ

ham ko us kūche kā saudā ho to saudā bhī nahīñ

lutf hotā to yahī thā ki na hote barbād

ham jo barbād hue to koī shikva bhī nahīñ

shikva-e-jaur to karte haiñ magar sach to ye hai

lutf ham par ho 'jigar' ham ne ye chāhā bhī nahīñ

dil na diwana ho ye us ko gawara bhi nahin

chaak daman-o-gireban hon ye ima bhi nahin

hum liye jaenge kuchh us ka bharosa bhi nahin

jaan de den ye mohabbat ka taqaza bhi nahin

be-niyaz aap se ho jaen ye hota bhi nahin

dil hi jab dekhte hain koi tamanna bhi nahin

jaan be-tab si rahti hai ki ho jae nisar

aankh bhar kar abhi hum ne use dekha bhi nahin

zaKHm baDhta bhi nahin faisla jis se ho jae

tir wo dil mein laga hai ki nikalta bhi nahin

be-hijabi bhi nahin wo ki jo hosh uD jaen

hosh rah jaen Thikane hi dar-parda bhi nahin

chain paDta hi nahin hai kisi karwaT hum ko

KHar sine mein chhupa hun koi aisa bhi nahin

phir bhi dil hai ki usi par hue jata hai nisar

aankh uTha kar kabhi jis ne hamein dekha bhi nahin

zarre zarre pe bahaar aa gai dil mein bhi bahaar

jazba-e-shauq hamara abhi bhaDka bhi nahin

panw rakhte bhi nahin aap baDhe jate hain

hum ko us kuche ka sauda ho to sauda bhi nahin

lutf hota to yahi tha ki na hote barbaad

hum jo barbaad hue to koi shikwa bhi nahin

shikwa-e-jaur to karte hain magar sach to ye hai

lutf hum par ho 'jigar' hum ne ye chaha bhi nahin