dil-nashin si ek sahar aur arghawani rang

dil-nashīñ sī ik sahar aur arġhavānī rang

vasl ke lamhāt par the kāmrānī rang

us kā pahlū us kā saaya ḳhvāb kyoñ TuuTā

rah-guzāroñ meñ saje the jāvedānī rang

ik adā-e-dilbarīñ se paas se guzrā

the lab-o-ruḳhsār phir ātish-fishānī rang

tere mere biich thā itnā ta.alluq bas

shā.irī ko chāhiye the kuchh kahānī rang

qurmuzī sā āftāb aur dhundlā joban

āsmāñ par duur tak the āsmānī rang

thā kinārā jhiil kā aur koh kā dāman

sej thī phūloñ kī aur the zāfrānī rang

thā nigah meñ kis kā partav ai banafshī sub.h

yaar kā chehra thā yā phir saat dhānī rang

dil-nashin si ek sahar aur arghawani rang

wasl ke lamhat par the kaamrani rang

us ka pahlu us ka saya KHwab kyon TuTa

rah-guzaron mein saje the jawedani rang

ek ada-e-dilbarin se pas se guzra

the lab-o-ruKHsar phir aatish-fishani rang

tere mere bich tha itna talluq bas

shairi ko chahiye the kuchh kahani rang

qurmuzi sa aaftab aur dhundla joban

aasman par dur tak the aasmani rang

tha kinara jhil ka aur koh ka daman

sej thi phulon ki aur the zafrani rang

tha nigah mein kis ka partaw ai banafshi subh

yar ka chehra tha ya phir sat dhani rang