dil ne chaha tha jise apne sahaare ki tarah

dil ne chāhā thā jise apne sahāre kī tarah

ġham usī shaḳhs kā bhaḌkā hai sharāre kī tarah

terā ehsān na bhūlūñgā ġham-e-yār ki tū

roz sajtā hai mirī aañkh meñ taare kī tarah

kitne ilhām ke rañgoñ se rañgā hai chehra

jis ko paḌhtā huuñ maiñ qur.ān ke paare kī tarah

sho.ala lapkā hai tire husn kā aise bhī kabhī

sher mere bhī hue shoḳh añgāre kī tarah

ik nishāñ ret pe dekhā thā musalsal bante

marte lamhoñ meñ kahīñ duur kināre kī tarah

gudgudātā hai tirī yaad kā mausam dil ko

khilkhilāte hue phūloñ ke nazāre kī tarah

vasl ke pal bhī bujhī raakh kī sūrat Thahre

sard-mehrī se kiye ek ishāre kī tarah

dil ne chaha tha jise apne sahaare ki tarah

gham usi shaKHs ka bhaDka hai sharare ki tarah

tera ehsan na bhulunga gham-e-yar ki tu

roz sajta hai meri aankh mein tare ki tarah

kitne ilham ke rangon se ranga hai chehra

jis ko paDhta hun main quran ke pare ki tarah

shoala lapka hai tere husn ka aise bhi kabhi

sher mere bhi hue shoKH angare ki tarah

ek nishan ret pe dekha tha musalsal bante

marte lamhon mein kahin dur kinare ki tarah

gudgudata hai teri yaad ka mausam dil ko

khilkhilate hue phulon ke nazare ki tarah

wasl ke pal bhi bujhi rakh ki surat Thahre

sard-mehri se kiye ek ishaare ki tarah