dil ne ek jashn manaya kal raat

dil ne ik jashn manāyā kal raat

yaad koī bahut aaya kal raat

duur tak chāñd kī sūrat hamrāh

tū thā yā vo tirā saaya kal raat

chashm-e-giryāñ ne to had hī kar dī

kis qadar hashr uThāyā kal raat

terī ḳhushbū kī pazīrā.ī meñ

chāñd ne giit sunāyā kal raat

niiñd ne niiñd kī sauġhāteñ diiñ

ḳhvāb ne ḳhvāb dikhāyā kal raat

dil ne ek jashn manaya kal raat

yaad koi bahut aaya kal raat

dur tak chand ki surat hamrah

tu tha ya wo tera saya kal raat

chashm-e-giryan ne to had hi kar di

kis qadar hashr uThaya kal raat

teri KHushbu ki pazirai mein

chand ne git sunaya kal raat

nind ne nind ki saughaten din

KHwab ne KHwab dikhaya kal raat