dil-o-dimagh jalae hain is ‘amal ke liye

dil-o-dimāġh jalā.e haiñ is ‘amal ke liye

na.ī zamīn nikālī na.ī ġhazal ke liye

nafāsatoñ meñ bhī apnī misāl aap haiñ ham

guloñ ke bose bhī ham ne sañbhal sañbhal ke liye

safar meñ rahte haiñ har-vaqt ḳhushbuoñ kī tarah

sukūñ milā na kahīñ ham ko ek pal ke liye

ye rāh-e-ishq-o-vafā hai yahāñ kā maslak hai

qadam qadam raho tayyār tum ajal ke liye

havā meñ is qadr tezābiyat samā.ī hai

ki shāḳh shāḳh tarastī hai phūl-o-phal ke liye

hare bhare haiñ har ik haal meñ vo ai 'aḳhtar'

qalandaroñ ko koī ġham nahīñ hai kal ke liye

dil-o-dimagh jalae hain is ‘amal ke liye

nai zamin nikali nai ghazal ke liye

nafasaton mein bhi apni misal aap hain hum

gulon ke bose bhi hum ne sanbhal sanbhal ke liye

safar mein rahte hain har-waqt KHushbuon ki tarah

sukun mila na kahin hum ko ek pal ke liye

ye rah-e-ishq-o-wafa hai yahan ka maslak hai

qadam qadam raho tayyar tum ajal ke liye

hawa mein is qadr tezabiyat samai hai

ki shaKH shaKH tarasti hai phul-o-phal ke liye

hare bhare hain har ek haal mein wo ai 'aKHtar'

qalandaron ko koi gham nahin hai kal ke liye