dil o dimagh mein ehsas-e-gham ubhaar diya

dil o dimāġh meñ ehsās-e-ġham ubhār diyā

ye kis ne aaj mujhe muzhda-e-bahār diyā

tire jilau meñ baḌhī hai chaman kī shādābī

guloñ kā rañg tire husn ne nikhār diyā

zarā laboñ ke tabassum se bazm garmā.eñ

hameñ to aap kī āñkhoñ kī chup ne maar diyā

vo baar baar mujhe mehrbāñ nazar aa.e

mujhe fareb nigāhoñ ne baar baar diyā

tumhī kaho tumheñ kis kī nigāh le Duubī

mujhe to ḳhair mirī sādgī ne maar diyā

ajiib baat hai dil Duub Duub jaatā hai

ajiib raat hai bujhtā hai baar baar diyā

hameñ vo sāhib-e-ālām dahr meñ 'shahzād'

zarā hañse to zamāne kā ġham nikhār diyā

dil o dimagh mein ehsas-e-gham ubhaar diya

ye kis ne aaj mujhe muzhda-e-bahaar diya

tere jilau mein baDhi hai chaman ki shadabi

gulon ka rang tere husn ne nikhaar diya

zara labon ke tabassum se bazm garmaen

hamein to aap ki aankhon ki chup ne mar diya

wo bar bar mujhe mehrban nazar aae

mujhe fareb nigahon ne bar bar diya

tumhi kaho tumhein kis ki nigah le Dubi

mujhe to KHair meri sadgi ne mar diya

ajib baat hai dil Dub Dub jata hai

ajib raat hai bujhta hai bar bar diya

hamein wo sahib-e-alam dahr mein 'shahzad'

zara hanse to zamane ka gham nikhaar diya