dil-o-nazar ke liye bais-e-qarar jo tha

dil-o-nazar ke liye bā.is-e-qarār jo thā

'azāb-e-jāñ hai vahī jān-e-e'tibār jo thā

kisī se ho na sakī zaḳhm-e-dil kī baḳhiya-garī

har ek chārāgar-e-dard ḳhām-kār jo thā

fanā ke baa'd bhī baaqī rahā vujūd mirā

mire ḳhulūs meñ rang-e-sadābahār jo thā

qabā-darīda the ġhunche lahūluhān the gul

chaman meñ ab ke baras mausam-e-bahār jo thā

havā-e-vaqt uḌā le ga.ī kahāñ us ko

vo naḳhvatoñ kā falak-bos kohsār jo thā

tabassumoñ kī naqāboñ meñ kaise chhup jaatā

diloñ kā dard jabīnoñ se āshkār jo thā

sukūn miltā kahāñ se dil-e-tabāh tujhe

hamārā dushman-e-jāñ apnā ġham-gusār jo thā

zamāna gard-e-rifāqat bhī us kī pā na sakā

libās-e-faqr meñ vo ek tājdār jo thā

sar-e-'azīz' jhukā bhī to sarfarāz huā

ki tere 'ishq kī 'azmat kā pāsdār jo thā

dil-o-nazar ke liye bais-e-qarar jo tha

'azab-e-jaan hai wahi jaan-e-e'tibar jo tha

kisi se ho na saki zaKHm-e-dil ki baKHiya-gari

har ek chaaragar-e-dard KHam-kar jo tha

fana ke ba'd bhi baqi raha wujud mera

mere KHulus mein rang-e-sadabahaar jo tha

qaba-darida the ghunche lahuluhan the gul

chaman mein ab ke baras mausam-e-bahaar jo tha

hawa-e-waqt uDa le gai kahan us ko

wo naKHwaton ka falak-bos kohsar jo tha

tabassumon ki naqabon mein kaise chhup jata

dilon ka dard jabinon se aashkar jo tha

sukun milta kahan se dil-e-tabah tujhe

hamara dushman-e-jaan apna gham-gusar jo tha

zamana gard-e-rifaqat bhi us ki pa na saka

libas-e-faqr mein wo ek tajdar jo tha

sar-e-'aziz' jhuka bhi to sarfaraaz hua

ki tere 'ishq ki 'azmat ka pasdar jo tha