dil par ik naqsh mohabbat kā ubhāreñ to sahī
zindagī apnī sañvar jaa.e sañvāreñ to sahī
ziist añdheroñ se nikal kar mah-e-kāmil ban jaa.e
us kī yādoñ se zarā dil ko nikhāreñ to sahī
be-niyāzī hai jahāñ lutf-o-karam bhī haiñ vahāñ
us ko pyaar aur mohabbat se pukāreñ to sahī
itnā mil jaa.e ki duniyā kī havas miT jaa.e
us ke aage zarā dāman ko pasāreñ to sahī
dil kī āvāz bhī āvāz-e-jaras lagtī hai
jā ke vīrāne meñ ik raat guzāreñ to sahī
mom kar detī hai patthar ko bhī mīThī āvāz
ham unheñ pyaar se ik baar pukāreñ to sahī
chāñd bādal meñ chhupā hai to nikal āye.gā
raat kī chhāñv meñ vo zulf sañvāreñ to sahī
dekheñ kyā faisla kartī hai adālat un kī
aaj ik pyaar kī darḳhvāst guzāreñ to sahī
ho na ho un se mulāqāt 'musavvir' lekin
un kī rāhoñ ko nigāhoñ se sañvāreñ to sahī
dil par ek naqsh mohabbat ka ubhaaren to sahi
zindagi apni sanwar jae sanwaren to sahi
zist andheron se nikal kar mah-e-kaamil ban jae
us ki yaadon se zara dil ko nikhaaren to sahi
be-niyazi hai jahan lutf-o-karam bhi hain wahan
us ko pyar aur mohabbat se pukaren to sahi
itna mil jae ki duniya ki hawas miT jae
us ke aage zara daman ko pasaren to sahi
dil ki aawaz bhi aawaz-e-jaras lagti hai
ja ke virane mein ek raat guzaren to sahi
mom kar deti hai patthar ko bhi miThi aawaz
hum unhen pyar se ek bar pukaren to sahi
chand baadal mein chhupa hai to nikal aayega
raat ki chhanw mein wo zulf sanwaren to sahi
dekhen kya faisla karti hai adalat un ki
aaj ek pyar ki darKHwast guzaren to sahi
ho na ho un se mulaqat 'musawwir' lekin
un ki rahon ko nigahon se sanwaren to sahi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
