dil rahega yunhi betab nazar aata hai

dil rahegā yūñhī betāb nazar aatā hai

jāgne par bhī vahī ḳhvāb nazar aatā hai

sāmne dekhūñ to paḌtā hai mire dil pe vo aks

muḌ ke dekhūñ to vo mahtāb nazar aatā hai

khaa.e jaatā hai mire baaġh ke har peḌ ko ghun

duur hī duur se shādāb nazar aatā hai

ġhusl ke vāste shabnam nahīñ hogī kaafī

sāya-e-gul jo tah-e-āb nazar aatā hai

hai mirī niiñd ke malbe pe hī ta.amīr us kī

ye jo ik ḳhvāb pas-e-ḳhvāb nazar aatā hai

kyā ajab shahr-e-tamannā thā abhī aur pal meñ

parda-e-chashm pe sailāb nazar aatā hai

dil rahega yunhi betab nazar aata hai

jagne par bhi wahi KHwab nazar aata hai

samne dekhun to paDta hai mere dil pe wo aks

muD ke dekhun to wo mahtab nazar aata hai

khae jata hai mere bagh ke har peD ko ghun

dur hi dur se shadab nazar aata hai

ghusl ke waste shabnam nahin hogi kafi

saya-e-gul jo tah-e-ab nazar aata hai

hai meri nind ke malbe pe hi tamir us ki

ye jo ek KHwab pas-e-KHwab nazar aata hai

kya ajab shahr-e-tamanna tha abhi aur pal mein

parda-e-chashm pe sailab nazar aata hai