dil sarabon se guzar kar shad rakh

dil sarāboñ se guzar kar shaad rakh

dasht meñ dariyā kā manzar yaad rakh

sar asīr-e-sar-bulandī hī rahe

kaj-kulāhī se magar āzād rakh

is jahāñ meñ hai zavālī har uruuj

yaad itnā ai sitam-ījād rakh

qatra-e-nāchīz samjhā tū jise

band hai us meñ samundar yaad rakh

baat apnī bhuul jā tū bhuul jā

yaad lekin hurmat-e-ajdād rakh

paas tesha ho na ho ai kohkan

dil meñ lekin jazba-e-farhād rakh

tez āñdhī ke parind uḌne se qabl

shahparoñ meñ saḳhtī-e-faulād rakh

dil hamesha sang-dil ke sāmne

be-niyāz-e-sheva-e-faryād rakh

lo chale to muzmahil 'nādim' na ho

dil sabā kī yaad se ābād rakh

dil sarabon se guzar kar shad rakh

dasht mein dariya ka manzar yaad rakh

sar asir-e-sar-bulandi hi rahe

kaj-kulahi se magar aazad rakh

is jahan mein hai zawali har uruj

yaad itna ai sitam-ijad rakh

qatra-e-nachiz samjha tu jise

band hai us mein samundar yaad rakh

baat apni bhul ja tu bhul ja

yaad lekin hurmat-e-ajdad rakh

pas tesha ho na ho ai kohkan

dil mein lekin jazba-e-farhad rakh

tez aandhi ke parind uDne se qabl

shahparon mein saKHti-e-faulad rakh

dil hamesha sang-dil ke samne

be-niyaz-e-shewa-e-faryaad rakh

lo chale to muzmahil 'nadim' na ho

dil saba ki yaad se aabaad rakh