dil se tumhaari yaad bhulane chala hun main

dil se tumhārī yaad bhulāne chalā huuñ maiñ

lau aur sham-e-ġham kī baḌhāne chalā huuñ maiñ

behtar vo maut hai jo mile zindagī se duur

vīrāniyoñ meñ ḳhud ko luTāne chalā huuñ maiñ

bekār zindagī ye ḳhalish ke baġhair thī

haath apnā hādsoñ se milāne chalā huuñ maiñ

phir Dūbne chalā huuñ kisī kī nigāh meñ

phir hosh kho ke hosh meñ aane chalā huuñ maiñ

sham.eñ jalā ke ārzūoñ ke mazār par

barbādiyoñ kā jashn manāne chalā huuñ maiñ

nākām hasratoñ ke janāze liye hue

duniyā ko apne zaḳhm dikhāne chalā huuñ maiñ

Thukrā ke aaj saare sahāroñ ko ai 'shafīq'

ḳhud apnī bigḌī aap banāne chalā huuñ maiñ

dil se tumhaari yaad bhulane chala hun main

lau aur sham-e-gham ki baDhane chala hun main

behtar wo maut hai jo mile zindagi se dur

viraniyon mein KHud ko luTane chala hun main

bekar zindagi ye KHalish ke baghair thi

hath apna hadson se milane chala hun main

phir Dubne chala hun kisi ki nigah mein

phir hosh kho ke hosh mein aane chala hun main

shamen jala ke aarzuon ke mazar par

barbaadiyon ka jashn manane chala hun main

nakaam hasraton ke janaze liye hue

duniya ko apne zaKHm dikhane chala hun main

Thukra ke aaj sare sahaaron ko ai 'shafiq'

KHud apni bigDi aap banane chala hun main