dil taDap jae na kyun sun kar fughan-e-ahl-e-dard

dil taḌap jaa.e na kyuuñ sun kar fuġhān-e-ahl-e-dard

un se pūchho jo samajhte haiñ zabān-e-ahl-e-dard

ek se ik baḌh ke hai dilchasp dilkash dil-sitāñ

hāl-e-dil afsāna-e-ġham dāstān-e-ahl-e-dard

ye to kahiye muñh se ik uf tak kisī ne kī kabhī

le chuke haiñ aap aksar imtihān-e-ahl-e-dard

haath dho le jaan se koī to jī bhar kar sune

jāñ-sitān-e-ahl-e-dil hai dāstān-e-ahl-e-dard

kis ke aage dard-e-dil apnā kahoge tum 'shafaq'

koī duniyā meñ nahīñ ab qadr-dān-e-ahl-e-dard

dil taDap jae na kyun sun kar fughan-e-ahl-e-dard

un se puchho jo samajhte hain zaban-e-ahl-e-dard

ek se ek baDh ke hai dilchasp dilkash dil-sitan

haal-e-dil afsana-e-gham dastan-e-ahl-e-dard

ye to kahiye munh se ek uf tak kisi ne ki kabhi

le chuke hain aap aksar imtihan-e-ahl-e-dard

hath dho le jaan se koi to ji bhar kar sune

jaan-sitan-e-ahl-e-dil hai dastan-e-ahl-e-dard

kis ke aage dard-e-dil apna kahoge tum 'shafaq'

koi duniya mein nahin ab qadr-dan-e-ahl-e-dard