dil taDapta hai mera har din sahar hone ke baad

dil taḌaptā hai mirā har din sahar hone ke ba.ad

maut aa jaa.e na tere bin sahar hone ke ba.ad

shaam tak fursat na tujh ko saañs lene kī mile

aa ke taklīfeñ mirī tū gin sahar hone ke ba.ad

raat aa.ī aa.e maiḳhāne meñ kāfir ho ga.e

aur phir se ban ga.e momin sahar hone ke ba.ad

niiñd to kyā chiiz āñkheñ band bhī ham ne na kī

jab vo bole ā.eñge lekin sahar hone ke ba.ad

chain dil ko aañkh ko ThanDak ḳhirad ko tāzgī

ne.amateñ milnā hai ye mumkin sahar hone ke ba.ad

un ke dil meñ merī ulfat yuuñ samā.ī jis tarah

phuul meñ ḳhushbū huī sākin sahar hone ke ba.ad

raat bhar ashkoñ ko roke muskurāyā thā magar

ho gayā zāhir mirā bātin sahar hone ke ba.ad

ḳhauf aatā hai mujhe 'haidar' zamāne se bahut

aa ke ban jā tū mirā zāmin sahar hone ke ba.ad

dil taDapta hai mera har din sahar hone ke baad

maut aa jae na tere bin sahar hone ke baad

sham tak fursat na tujh ko sans lene ki mile

aa ke taklifen meri tu gin sahar hone ke baad

raat aai aae maiKHane mein kafir ho gae

aur phir se ban gae momin sahar hone ke baad

nind to kya chiz aankhen band bhi hum ne na ki

jab wo bole aaenge lekin sahar hone ke baad

chain dil ko aankh ko ThanDak KHirad ko tazgi

neamaten milna hai ye mumkin sahar hone ke baad

un ke dil mein meri ulfat yun samai jis tarah

phul mein KHushbu hui sakin sahar hone ke baad

raat bhar ashkon ko roke muskuraya tha magar

ho gaya zahir mera baatin sahar hone ke baad

KHauf aata hai mujhe 'haidar' zamane se bahut

aa ke ban ja tu mera zamin sahar hone ke baad