dil talabgar sahi hashr-ba-daman kyun hai

dil talabgār sahī hashr-ba-dāmāñ kyuuñ hai

nāla-zan sho.ala-ba-kaf shauq-e-farāvāñ kyuuñ hai

mahfil-e-sāz-o-tarab matl.a-e-vīrāñ kyuuñ hai

sheva-o-sabr-o-sukūñ dil se gurezāñ kyuuñ hai

khīñch laayā thā jo us dil ko tirī mahfil meñ

vahī andāz-e-nazar aaj pashemāñ kyuuñ hai

surañgoñ raah meñ har-gām huā jaatā hai

muzmahil ḳhū-e-safar dard pashemāñ kyuuñ hai

talḳhī-e-kām-o-dahan kashmakash-e-zehn-o-vajūd

ek hastī ke liye ye sar-o-sāmāñ kyuuñ hai

dasht-paimā.ī meñ bhī vahshat-e-jāñ itnī na thī

tishnagī sāhil-e-dariyā pe hirāsāñ kyuuñ hai

dil talabgar sahi hashr-ba-daman kyun hai

nala-zan shoala-ba-kaf shauq-e-farawan kyun hai

mahfil-e-saz-o-tarab matla-e-viran kyun hai

shewa-o-sabr-o-sukun dil se gurezan kyun hai

khinch laya tha jo us dil ko teri mahfil mein

wahi andaz-e-nazar aaj pasheman kyun hai

surangon rah mein har-gam hua jata hai

muzmahil KHu-e-safar dard pasheman kyun hai

talKHi-e-kaam-o-dahan kashmakash-e-zehn-o-wajud

ek hasti ke liye ye sar-o-saman kyun hai

dasht-paimai mein bhi wahshat-e-jaan itni na thi

tishnagi sahil-e-dariya pe hirasan kyun hai