dil wahi dil jise nashad kiye jata hun

dil vahī dil jise nāshād kiye jaatā huuñ

ya.anī rah rah ke unheñ yaad kiye jaatā huuñ

sa.ī-e-zabt-e-ġham-e-bedād kiye jaatā huuñ

puḳhta-tar ishq kī buniyād kiye jaatā huuñ

dil ko vaqf-e-ġham-e-bedād kiye jaatā huuñ

apnā ghar aap hī barbād kiye jaatā huuñ

ek vo haiñ ki taġhāful se nahīñ un ko gurez

ek maiñ huuñ ki unheñ yaad kiye jaatā huuñ

kyā ye kam zulm hai kuchh ġhaur to kiije dil meñ

aap hañste haiñ maiñ fariyād kiye jaatā huuñ

bhuul kar ahd-e-guzishta kī hikāyāt 'shakīl'

dil ko har fikr se āzād kiye jaatā huuñ

dil wahi dil jise nashad kiye jata hun

yani rah rah ke unhen yaad kiye jata hun

sai-e-zabt-e-gham-e-bedad kiye jata hun

puKHta-tar ishq ki buniyaad kiye jata hun

dil ko waqf-e-gham-e-bedad kiye jata hun

apna ghar aap hi barbaad kiye jata hun

ek wo hain ki taghaful se nahin un ko gurez

ek main hun ki unhen yaad kiye jata hun

kya ye kam zulm hai kuchh ghaur to kije dil mein

aap hanste hain main fariyaad kiye jata hun

bhul kar ahd-e-guzishta ki hikayat 'shakil'

dil ko har fikr se aazad kiye jata hun