dilasa de ke bahlaya hai dil ko

dilāsā de ke bahlāyā hai dil ko

baḌī mushkil se samjhāyā hai dil ko

tire ġham ne jo chamkāyā hai dil ko

misāl-e-ā.ina paayā hai dil ko

tirī ulfat meñ ai jān-e-tamannā

zamāne bhar se Takrāyā hai dil ko

ḳhirad se be-ta.alluq ho ga.e jab

junūñ kī raah meñ paayā hai dil ko

zahe-qismat ki haq-goī kā jazba

maqām-e-dār tak laayā hai dil ko

kisī ne bazm meñ nīchī nazar se

salām-e-shauq pahuñchāyā hai dil ko

vafā vāloñ ne ġham kī laaj rakkhī

vafā vāloñ ne apnāyā hai dil ko

kisī ne pher kar dil se nigāheñ

na pūchho kitnā taḌpāyā hai dil ko

hamesha rahravān-e-āgahī ne

charāġh-e-rahguzar paayā hai dil ko

kabhī jazbāt kā paikar banāyā

kabhī bātoñ meñ uljhāyā hai dil ko

'nigār' us shoḳh ne apnī nazar se

ḳhudī kā raaz samjhāyā hai dil ko

dilasa de ke bahlaya hai dil ko

baDi mushkil se samjhaya hai dil ko

tere gham ne jo chamkaya hai dil ko

misal-e-aina paya hai dil ko

teri ulfat mein ai jaan-e-tamanna

zamane bhar se Takraya hai dil ko

KHirad se be-talluq ho gae jab

junun ki rah mein paya hai dil ko

zahe-qismat ki haq-goi ka jazba

maqam-e-dar tak laya hai dil ko

kisi ne bazm mein nichi nazar se

salam-e-shauq pahunchaya hai dil ko

wafa walon ne gham ki laj rakkhi

wafa walon ne apnaya hai dil ko

kisi ne pher kar dil se nigahen

na puchho kitna taDpaya hai dil ko

hamesha rahrawan-e-agahi ne

charagh-e-rahguzar paya hai dil ko

kabhi jazbaat ka paikar banaya

kabhi baaton mein uljhaya hai dil ko

'nigar' us shoKH ne apni nazar se

KHudi ka raaz samjhaya hai dil ko